Author: bot videobot

Gjatë një interviste me gazetaren Rudina Xhunga në podcast-in e tij “Flasim,”, Kryeministri Edi Rama komentoi aktualitetin politik në Shqipëri.

I pyetur për ish-presidentin Ilir Meta, kryesocialisti e cilësoi atë si një talent politik, por tha se nuk arriti ta përballonte peshën e pushtetit.

Më tej ai shprehu se pushteti është një forcë që ka “ngrënë” shumë burra dhe, në rastin e Metës, e ka katandisur atë në një personazh qesharak”.

Edi Rama:Ishte një talent, talent i madh politik që nuk e mbajti dot peshën. Pushteti është një kafshë e përbindshme. Ka ngrënë, e ka futur nën vete shumë burra. Domethënë, u katandis në një personazh qesharak

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Telefonata e fundit e Lorena Itzerit, 46 vjeçe, është bërë një prej provave kryesore në hetimin e ngjarjes së rëndë në Firence, ku ajo u vra nga ish-partneri i saj, 36-vjeçari Federico Vela.

Gruaja telefonoi në numrin e emergjencës 112 pak pas orës 14:00, ndërsa ndodhej e mbyllur në bagazhin e makinës së ish-partnerit. Telefonata zgjati rreth 20 minuta dhe regjistroi momentet dramatike para tragjedisë.

“Ish-i dashuri im më rrahu dhe më rrëmbeu”, i tha Lorena policisë, duke shpjeguar se Vela e kishte sulmuar në një garazh dhe më pas e kishte futur në automjet, ku e kishte lidhur.

Ajo u përpoq t’u jepte efektivëve sa më shumë informacion për autorin.

“Është ish-i im, emri i tij është Federico, është 36 vjeç. Kam qenë në makinë për rreth dhjetë minuta”, tha ajo.

Pavarësisht situatës së rëndë, 46-vjeçarja arriti të qëndronte e qetë. Ajo u tha efektivëve se nuk e dinte se ku po e çonte ish-partneri, por dyshonte se ai po shkonte drejt banesës së tij në lagjen Galluzzo të Firences.

Telefonata kishte probleme për shkak të lëvizjes së automjetit në autostradën A1. Rreth tetë minuta pas nisjes së telefonatës, policia kuptoi se situata ishte kritike. Telefoni i Lorenës po regjistronte gjithçka që po ndodhte brenda makinës.

Në një moment, automjeti ndaloi dhe u dëgjua hapja e bagazhit. Efektivët qëndruan të heshtur, në mënyrë që të mos kuptohej prania e tyre.

Më pas u dëgjua zëri i Lorenës, e cila iu drejtua ish-partnerit të saj me fjalët: Çfarë po bën? Të dua, mos u shqetëso, do të takohemi përsëri.

Autoritetet besojnë se këto mund të kenë qenë përpjekjet e fundit të 46-vjeçares për ta qetësuar Velën dhe për ta bindur që të mos e vriste.

Sipas hetimeve, 36-vjeçari nuk e kishte pranuar ndarjen e tyre dhe në javët e fundit i kishte bërë presion përmes mesazheve.

Pak minuta pas telefonatës, Vela shkoi me makinë pranë një ure mbi autostradën A1, në Barberino del Mugello, dhe e hodhi Lorenën nga ura.

Rreth 40 minuta më vonë, pas negociatave me policinë, edhe 36-vjeçari i dha fund jetës duke u hedhur nga i njëjti vend.

Telefonata e fundit e Lorenës tashmë është një prej elementëve më të rëndësishëm të dosjes hetimore, pasi ka dokumentuar minutat dramatike para përfundimit tragjik të ngjarjes.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Udhëtarët që hyjnë në Bashkimin Evropian mund të përballen me radhë më të gjata në kufi, pasi më 6 shtator përfundon periudha e fleksibilitetit për zbatimin e sistemit të hyrje-daljeve (EES).

Megjithatë, disa shtete anëtare pritet të mos zbatojnë ende plotësisht kontrollet biometrike, për shkak të problemeve teknike dhe vonesave në përgatitjen e infrastrukturës.

Sistemi EES kërkon regjistrimin e udhëtarëve nga vende jashtëBE-së, përfshirë marrjen e të dhënave biometrike, si fotografia dhe gjurmët e gishtërinjve, gjatë kalimit të kufirit.

Komisioni Evropian nuk e ka zgjatur zyrtarisht periudhën e fleksibilitetit, pavarësisht kërkesave të industrisë së aviacionit dhe udhëtimeve që zbatimi gradual të vazhdojë deri në fund të vitit.

Linjat ajrore dhe operatorët e udhëtimeve kanë paralajmëruar se zbatimi i plotë i kontrolleve biometrike mund të shkaktojë rritje të ndjeshme të kohës së pritjes në aeroporte dhe pika të tjera kufitare.

Në fillim të zbatimit të EES janë raportuar radhë të gjata në disa aeroporte evropiane, duke bërë që një pjesë e pasagjerëve të humbnin fluturimet e tyre.

Industria e udhëtimeve argumenton se situata është përmirësuar gjatë muajve të fundit kryesisht falë zbatimit fleksibël të rregullave dhe jo sepse problemet teknike janë zgjidhur plotësisht.

Udhëtarët që kalojnë nga Mbretëria e Bashkuar drejt Francës nuk pritet të përballen me ndryshime të menjëhershme, pasi pajisjet për marrjen e të dhënave biometrike në disa pika të rëndësishme ende nuk janë plotësisht funksionale.

Kioskat e vendosura në Eurotunnel, Portin e Doverit dhe terminalin Eurostar në St Pancras vazhdojnë të kenë probleme teknike.

Eurotunnel ka deklaruar se është në pritje të konfirmimit nga autoritetet franceze për fazën e ardhshme të zbatimit, ndërsa Eurostar ka bërë të ditur se regjistrimet në EES do të vazhdojnë të kryhen manualisht nga punonjësit e kontrollit kufitar.

Edhe Porti i Doverit nuk pret ndryshime të menjëhershme për drejtuesit e automjeteve, pasi ata aktualisht nuk i nënshtrohen kontrolleve EES në të njëjtën mënyrë si udhëtarët e tjerë.

Komisioni Evropian ka deklaruar se është në kontakt me shtetet anëtare ku nevojiten rregullime të mëtejshme në pikat e kalimit kufitar.

Brukseli ka bërë të ditur se do të ofrojë mbështetje shtesë gjatë periudhës së përshtatjes operacionale, por deri tani nuk ka njoftuar zgjatjen e periudhës së fleksibilitetit përtej 6 shtatorit.

Për udhëtarët nga vendet jashtë BE-së, përfshirë britanikët dhe shtetasit e vendeve të tjera që nuk janë pjesë e zonës së lëvizjes së lirë, kjo do të thotë se kalimet kufitare mund të kërkojnë më shumë kohë, veçanërisht në aeroportet dhe pikat më të ngarkuara të hyrjes në Evropë.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Bisnezmeni Luan Muça ka reaguar pas konfliktit me armë në Vlorë duke dhënë versionin e tij për ngjarjen që ndodhi ditën e enjte.

Muça shprehu se ai kishte shkuar të sqarohej me biznesmenin Vasil Bedinaj për një pronë në Palasë dhe ka akuzuar këtë të fundit se e kishte pritur me persona të armatosur, të cilët sipas tij qëlluan me armë në momentin që ai po largohej nga ambientet e hotelit.

Kam heshtur deri tani, sepse në pozitën ku kam qenë e kam pasur të pamundur të flas dhe mendoj se publiku ka të drejtën ta dëgjojë të vërtetën drejtpërdrejt nga unë.

Që prej vitit 2019, kam vendosur të ndërmarr një investim në zonën e Palasës. Gjatë kësaj kohe, kam blerë në Palasë, nga shumë pronarë vendas, 97.000 m² tokë. Jam detyruar që, gjatë kësaj periudhe, pjesën më të madhe të tokës ta blej edhe nga dy herë.

Më datë 15.07.2021, kam aplikuar dhe kam marrë statusin e investitorit strategjik, mbështetur mbi një projekt të hartuar nga studioja ndërkombëtare EEA (Emre Arolat Architecture).

Në vitin 2022, mbi një pjesë të kësaj sipërfaqeje (26.000 m²), kam aplikuar për lejen e fazës së parë të ndërtimit të një hoteli me brand ndërkombëtar, me 5 yje.

Në vitin 2024, kam zbardhur lejen dhe kam filluar punimet për ndërtimin e këtij hoteli me brand ndërkombëtar.

Po në vitin 2024, kam bërë aplikim për fazën e dytë të këtij projekti.

Në mënyrë rastësore, nga rrjetet sociale, kam parë se ishte dhënë një leje në tokën që unë kam blerë dhe mbi të cilën ishte dhënë statusi i investitorit, sipas masterplanit të EEA Studio. Madje, po reklamohej për shitjen e njësive, apartamenteve apo vilave të ndryshme.

Pas kësaj, i jam drejtuar AZHT-së për të marrë më shumë informacion rreth kësaj çështjeje. Pas komunikimit që pata, më njoftuan se do të verifikoheshin të gjitha dokumentet e palëve dhe se, deri në momentin e përfundimit të verifikimit të dokumenteve, nuk do të kishte zbardhje të lejes së ndërtimit.

Pas rreth një ore, jam telefonuar nga shtetasi Vasil Bedinaj, i cili më kërkoi të mos i ekspozoja në AZHT pretendimet e mia mbi pronën time. Gjatë kësaj telefonate, u vendos që të takoheshim në Orikum, te hoteli i z. Bedinaj, për të diskutuar rreth kësaj situate. (Z. Bedinaj e kam njohur rreth një vit më parë, pasi ishte paraqitur në kantierin ku unë po ndërtoj në Palasë, duke kërkuar takim me mua në lidhje me disa pretendime që kishte për kufirin e pronës. Kur shkova atje, z. Bedinaj nuk ishte vetëm, por ishte i shoqëruar nga një numër i madh njerëzish të armatosur.)

Kështu, i shoqëruar nga familjarë të mi, kam shkuar, me ftesën e tij, në ambientet e biznesit të tij.

Pasi jemi takuar në Orikum dhe jemi ulur në tavolinë, sapo kam nisur t’i shpjegoj pretendimet e mia, z. Bedinaj e ka tensionuar situatën me pretendimet e veta, duke sharë dhe ofenduar.

Edhe pse nga kamerat që z. Bedinaj i ka servirur opinionit publik kjo nuk duket qartë, në këtë moment ai thirri njerëz të armatosur, të cilët ishin të pozicionuar në vende të ndryshme të ambienteve të tij.

Në këtë moment, situata ka degraduar dhe unë kam kuptuar se z. Bedinaj nuk më kishte thirrur për t’u sqaruar, por për të prodhuar skandalin e tij të radhës. Për këtë arsye, jam ngritur dhe kam ikur.

Duke dalë nga ambientet e z. Bedinaj, njerëzit që ai thirri qëlluan me armë ndaj nesh. Për sa më sipër, kërkoj nga Policia e Shtetit zbardhjen e kësaj ngjarjeje dhe identifikimin e plotë të grupit të qitësve.

Jam çuditur shumë që, gjatë kësaj situate, z. Bedinaj kishte qetësinë dhe përkujdesjen që, në të gjitha mediat mbi të cilat kishte ndikim, të shpërndante lajme të rreme, sipas të cilave unë i kisha vendosur gjobë, si dhe të shpërndante pamjet filmike nga këndet që ai dëshironte.

Kam mësuar këto ditë se nuk është hera e parë që z. Bedinaj manipulon opinionin publik për përplasjet e tij. Këtë gjë ka tentuar ta bëjë edhe në rastin tim.

Çuditërisht dhe paradoksalisht, të vetmit që e kanë besuar këtë gjë kanë qenë punonjësit e Policisë së Shtetit, të cilët më kanë mbajtur të ndaluar për 72 ore me akuzën e gjobëvënies ndaj z. Bedinaj.

Unë nuk mund të flas për veten time, pasi nuk e kam bërë kurrë më parë, sepse kam besuar se për njerëzit flasin punët dhe veprat e tyre.

Besoj se opinioni publik është i njohur me punët, brandet dhe kompanitë që kemi krijuar brenda dhe jashtë vendit.

Modestisht, mund të them se jam krijues dhe zhvillues i një konglomerati kompanish që operojnë në 4 kontinente, duke përfshirë Shtetet e Bashkuara, Indinë, si dhe vende si Italia,Senegali, Tunizia, Egjipti dhe, sigurisht, Ballkani, me një qarkullim vjetor multimilionësh.

Në këtë kontekst, fantazia e gjobës ndaj një personi me pantallona të shkurtra, i cili rrihet çdo vit me ndonjë turist, polic apo plazhist, është një fantazi dashakeqe e një grupi personash që mendojnë se, duke vjedhur pronat e të tjerëve, mund të bësh edhe para, të dalësh edhe burrë i mirë dhe të quhesh biznesmen.

Në fund, jam i gatshëm t’i vendos në dispozicion opinionit publik dhe mediave çdo dokument për të cilin kam shkruar në këtë reagim.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Ministri i Jashtëm rus, Sergei Lavrov, ka hedhur poshtë akuzat gjermane për përfshirjen e Moskës në incidentin me një dron të pajisur me eksplozivë në aeroportin e Leipzigut dhe ka paralajmëruar se pretendimet kundër Rusisë mund të çojnë në një përshkallëzim serioz.

“Akuzat kundër Rusisë janë fillimi i një lufte të vërtetë”, deklaroi Lavrov, duke i cilësuar pretendimet e Berlinit si një provokim të nxituar.

Incidenti në aeroportin Leipzig/Halle është kthyer në një çështje të ndjeshme mes Gjermanisë dhe Rusisë. Autoritetet gjermane dyshojnë se droni i zbuluar pranë një avioni transporti ukrainas kishte karakteristika të teknologjisë ruse dhe ishte i ngarkuar me eksplozivë.

Hetimet gjermane kanë çuar deri tani te dy persona të dyshuar për përfshirje në operacion. Njëri prej tyre është një burrë me origjinë ruse dhe pasaportë letoneze, i cili dyshohet se ka koordinuar operacionin dhe se ka kontakte me shërbimet sekrete ruse.

Sipas mediave gjermane, ai kishte hyrë në Gjermani përmes aeroportit të Berlinit dhe më pas kishte udhëtuar drejt Leipzigut me një makinë me qira. Pas incidentit, ai ishte larguar përsëri nga Gjermania.

Hetuesit kanë përdorur edhe prova biologjike për të identifikuar një të dyshuar të dytë. Gjurmë ADN-je u gjetën në një prej dronëve, brenda një ene metalike me eksplozivë, si dhe në një antenë të vendosur pranë aeroportit.

Sipas autoriteteve, antena mund të jetë përdorur për të përforcuar sinjalet e telefonisë celulare që shërbenin për kontrollin e dronëve.

Krahasimi i materialit gjenetik me bazat e të dhënave evropiane çoi hetuesit te një burrë me origjinë bjelloruse, i cili gjithashtu disponon pasaportë ruse. Autoritetet kanë rindërtuar lëvizjet e tij në Gjermani dhe dyshohet se ai kishte hyrë në vend me një vizë turistike italiane.

Pavarësisht këtyre zhvillimeve, autoritetet gjermane mbeten të kujdesshme në lidhje me përfshirjen e mundshme të Rusisë dhe mundësinë për të çuar të dyshuarit përpara drejtësisë.

Moska mohon çdo përfshirje në incident. Ambasada ruse në Berlin e ka cilësuar rastin si një “provokim të nxituar” dhe ka shprehur shqetësim për atë që e quan një valë të re të “histerisë anti-ruse” në Gjermani.

Çështja pritet të rrisë më tej tensionet mes Berlinit dhe Moskës, në një kohë kur Gjermania dhe aleatët e saj po përballen me një sërë akuzash për aktivitete të dyshuara ruse në territorin evropian.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Lea Salonga mori yllin e saj në Hollywood Walk of Fame, duke u bërë artistja e parë filipinase që merr këtë nderim.

Gjatë fjalimit të saj të pranimit, aktorja dhe këngëtarja, fituese e shumë çmimeve, reflektoi mbi rrugëtimin e saj nga hapat e parë në skenë deri te momenti kur mori yllin e 2,855-të në Walk of Fame. Ajo madje bëri shaka duke imagjinuar se si do të reagonte versioni i saj shtatëvjeçar ndaj këtij momenti.

“Shumë kohë para Hollywood-it, shumë kohë para Broadway-t, ishte Manila. Nëse do t’i kishit thënë Leas shtatëvjeçare, kur ajo debutoi në teatër me shfaqjen ‘Mbreti dhe Unë’ në Filipine, se pothuajse gjysmë shekulli më vonë do të qëndronte në Hollywood Boulevard, përpara këtij teatri historik, e rrethuar nga kaq shumë miq, të afërm dhe kolegë të dashur, për të marrë yllin e saj në Walk of Fame, ajo do t’ju kishte përgjigjur: ‘Ku është? Çfarë është kjo?’”, tha me shaka Salonga gjatë fjalimit.

Ajo theksoi se rrugëtimi i saj nuk do të kishte qenë i njëjtë pa kontributin dhe mbështetjen e njerëzve që kanë qenë pranë saj gjatë gjithë këtyre viteve.

“Asnjë karrierë nuk është kurrë vepër e një personi të vetëm. Pra, nëse do ta bënin këtë yll mjaftueshëm të madh, do të kishte shumë emra në të”, tha ajo.

Salonga falënderoi njerëzit që e kanë dashur, mbështetur, mbrojtur dhe inkurajuar gjatë karrierës së saj, si dhe mësuesit, regjisorët, kompozitorët dhe tekstshkruesit që kanë kontribuar në rrugëtimin e saj artistik.

Një pjesë e veçantë e fjalimit të saj iu kushtua nënës së saj, Ligaya, e cila ishte e pranishme në ceremoni dhe e ka mbështetur që nga hapat e parë të karrierës.

Lea Salonga, the singing voice of Mulan and Princess Jasmine, makes history as the first Filipina to receive a star on the Hollywood Walk of Fame ❤️https://t.co/3HfAB8CmH3pic.twitter.com/oKIIORDtf7

— Variety (@Variety)September 4, 2026

Salonga tregoi se nëna e saj u kujdes për kostot e prodhimit të albumit të saj të parë dhe më pas vizitoi dyqanet e muzikës për ta promovuar atë.

“Ajo ishte menaxherja ime për dekada, mbështetësja ime gjatë gjithë jetës. Asgjë nga këto nuk do të kishte ndodhur pa të”, u shpreh ajo.

Aktorja dhe këngëtarja falënderoi gjithashtu vëllain e saj, Gerard, kompozitor dhe dirigjent, ndërsa e cilësoi djalin e saj, Nick Chien, si burimin e saj më të madh të frymëzimit.

Gjatë karrierës së saj 45-vjeçare, Salonga ka arritur një sërë suksesesh dhe është shfaqur në evente të rëndësishme. Ajo ka marrë pjesë në aktivitete zyrtare për gjashtë presidentë filipinas dhe katër presidentë amerikanë, ndërsa ka performuar edhe për Princeshën Diana dhe Mbretëreshën Elizabeth II.

Në përfundim të fjalimit, Salonga shprehu shpresën se ky vlerësim do të frymëzojë brezin e ardhshëm të artistëve filipinas.

“Shpresoj që një ditë, një fëmijë i vogël nga Filipinet që vjen në Hollywood do ta shohë emrin tim dhe do të mendojë: ‘Ndoshta mund t’ia dal edhe unë këtu’”, përfundoi ajo.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Cristian Shpendi vazhdon të jetë vendimtar për Cesena-n.

Sulmuesi shqiptar shënoi në minutën e 77-të në përballjen ndaj Mantovës, duke barazuar rezultatin dhe duke i dhënë skuadrës së tij një pikë në këtë sfidë.

Ky ishte goli i tretë radhazi për Shpendin në tre ndeshjet e fundit, duke konfirmuar formën e mirë të sulmuesit shqiptar.

Shpendi ishte gjithashtu në qendër të vëmendjes gjatë ditëve të fundit të merkatos. Sulmuesi ishte shumë pranë transferimit te Cremonese, por marrëveshja nuk u finalizua dhe gjithçka dështoi në orët e fundit të merkatos.

Pavarësisht interesimit dhe negociatave për largimin, Shpendi ka vijuar të jetë një nga lojtarët kryesorë të Cesena-s dhe po përgjigjet në fushë me gola.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Të dërguarit e presidentit amerikan, Donald Trump, Steve Witkoff dhe Jared Kushner zhvilluan sot bisedime me Presidentin ukrainas Volodymyr Zelensky në Kiev, ndërsa administrata Trump rrit përpjekjet për t’i dhënë fund luftës 4-vjeçare të Rusisë me Ukrainën.

Jared Kushner tha se delegacioni amerikan pret me padurim më shumë përparim në bisedimet e paqes që synojnë t’i japin fund luftës në Ukrainë. Steve Witkoff tha gjithashtu se ekipi amerikan ishte “shumë i inkurajuar” nga ajo që ai e përshkroi si një diskutim shumë të rëndësishëm.

Dy amerikanët udhëtuan nga Moska, ku dje patën bisedime tre-orëshe me Presidentin rus Vladimir Putin, megjithatë, pa u bërë ndonjë përparim domethënës drejt paqes.

Presidenti ukrainas i priti të dërguarit në Katedralen e Shën Sofisë në qendër të Kievit, pranë vendit të një droni rus që u rrëzua të premten, duke synuar zyrat e shërbimeve të sigurisë ukrainase.

Para takimit, Zelensky kishte thënë gjithashtu se Ukraina ishte “e gatshme ta afronte fundin e luftës”.

Raundet e mëparshme të bisedimeve të ndërmjetësuara nga SHBA-ja u inkurajuan nga Presidenti i SHBA-së Donald Trump, i cili bëri fushatë me premtime për t’i dhënë fund luftës shpejt.

Trump la të kuptohej të premten se SHBA-të kishin një propozim të ri, por nuk dha detaje të mëtejshme.

Këshilltari i politikës së jashtme të Kremlinit, Yuri Ushakov, e përshkroi takimin e të enjtes si “jashtëzakonisht të dobishëm”, ndërsa një zyrtar i Shtëpisë së Bardhë i tha Reuters se hapat e ardhshëm do të shpallen në javët e ardhshme.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Autoritetet polake kanë konfirmuar një shkelje të mundshme të hapësirës ajrore të vendit nga një objekt i paidentifikuar që po afrohet nga Bjellorusia, njoftoi sot komanda operative kompetente e forcave të armatosura polake.

Në një postim në X, u raportua se një helikopter ushtarak u vendos si pjesë e konfirmimit të regjistrimeve të sistemit të radarit, me qëllim sqarimin e natyrës së objektit dhe përjashtimin e fenomeneve meteorologjike ose reflektimeve teknologjike.

E gjithë Europa ka qenë në alarm muajt e fundit pas incidentit me dronë në aeroportin e Lajpcigut, për të cilin Gjermania fajësoi Moskën. Të gjitha shtetet e bllokut kanë rritur vigjilencën për provokime të tjerë të mundshme.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Kur e gjithë Tirana fle, ka njerëz që punojnë pa u lodhur që qyteti të zgjohet sa më i pastër për të nisur një ditë e re.

Teksa zbardhet, zhvendosemi në një nga zonat më të populluara, jo shumë larg qendrës, ku Fatmira, nënë e 6 fëmijëve, ka zgjedhur të bëjë këtë punë, edhe pse nuk është aq e lehtë.

Por a mjafton vetëm puna e ekipeve të pastrimit për të mbajtur pastër një qytet si Tirana, me dinamikën e saj dhe të mbipopulluar?

“Unë e fshi, kur kthehem për gjysmë ore, e kanë mbushur. I hedhin nga ballkoni. Çfarë do t’u thoje këtyre njerëzve? – Mos i hidh plehrat, se ma nxive jetën“, shprehet Fatmira Jonuzi.

Fatmira nuk ankohet kurrë për lodhjen, por ka një shqetësim. “Nuk më lodh puna, por njerëzit na shajnë, na shajnë”, shprehet ajo.

E ndërsa Tirana nis të zgjohet e të hyjë në vrullin e ditës, rrugët duhen edhe larë. Gjithçka ka një grafik të caktuar, që nga boshatisja e kazanëve herët në mëngjes deri pak pas mesdite.

Eduart Isufaj, Inspektor i përgjithshëm i higjienës shprehet se “I lajnë një herë në mëngjes, një herë natën, pastaj vazhdohet me fshesaret deri në 2 të drekës”.

Lëvizjet që u bënë në bashki nga kryetari Erion Veliaj thonë se i mësuan nga lajmet, por e kuptuan më shumë nga një mbledhje urgjente që u bë nga sekretari i përgjithshëm i rikthyer, Alban Dokushi.

“Në një mbledhje para dy ditësh na u tha të rrisim frekuencën e pastrimit”, thotë Isufaj.

Nga kjo mbledhje, veç nisjes së një aksioni për pastrimin e qytetit, në fokus kanë qenë rrugët, lirimi i hapësirave publike dhe zonat e neglizhuara.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.