Punë në Gjermani

Fituesja e Big Brother VIP 5, Selin Bollati, ka ndarë shumë detaje nga jeta e saj pas reality show-t.

E ftuar në një intervistë ekskluzive në “Ftesë në 5” me Bieta Sulon, Selin ka folur edhe për marrëdhënien e saj me Gimbon.

Fituesja e Big Brother VIP 5 ka treguar edhe dhuratën më të shtrenjtë që ka marrë nga Gimbo pas daljes nga shtëpia, ku mes 24 dhuratave që ish-banori i kishte bërë për 24-vjetorin e saj, ishte edhe një makinë e re.

“Gimbo, kam shumë ankesa, por nuk është ky vendi për t’i thënë. Jam shumë krenare dhe kam qenë një suport shumë i madh për Gimbon gjatë sezonit veror. Unë doja pushime, por nuk ka qenë ky rasti. Jam ndjerë shumë mirë që ka qenë shumë i suksesshëm për të si sezon. Dhurata më e shtrenjtë, dëgjo, se kur flas për dhurata më vijnë gjithmonë gjërat jo materiale, por shpirtërore. Gimbo është dorëlëshuar dhe zemërgjerë.

Unë nuk jam natyrë që festoj ditëlindje, por një nga dhuratat më të mëdha kanë qenë 24 dhuratat për 24 vitet që mbushja. Më e shtrenjta ka qenë një makinë e re. Nuk doja të ekspozoja gjë në Instagram. Jam shumë e kujdesshme, edhe pse njerëzit janë shumë kuriozë se çfarë po bëjmë. Më vjen keq sa herë dëgjoj llafe lart e poshtë që nuk kanë të ndalur. Të qenurit VIP ka koston e vet. Kam dëgjuar që jam bërë mendjemadhe, arrogante, nuk na flitet, jo. Jeta nuk ka ndryshuar”,u shpreh Selin.

Selin ka treguar se ka nisur bashkëjetesën me Gimbon dhe për të shprehet se është një djalë me zemër të madhe dhe shumë familjar.

“Jam e dashuruar, këtë e kam kuptuar më shumë pas Big Brother. Gimbo është një djalë me zemër të madhe, është shumë i kujdesshëm. Unë marr shumë mesazhe në ditë, herë-herë nga njerëz që thonë: “Ti je me fat për atë djalë.” Është shumë herë më i mirë se unë. Partneri është një bekim i madh. Jam me fat për marrëdhënien tonë. E plotëson pazëllin e idesë që unë kam pasur për partnerin tim. Thashë që nuk e doja DJ, por nuk doli keq. Gimbo është shumë familjar. Ne kemi nisur bashkëjetesën, Gimbo na gatuan”,tha Selin.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Kryetari i CDU-së dhe kancelari federal, Friedrich Merz, ka njoftuar pasoja pas fitores së thellë të AfD-së në Saksoni-Anhalt dhe humbjes së partisë së tij.

Kancelari i Gjermanisë u shpreh i tronditur për humbjen, pas mbledhjes urgjente me drejtuesit e CDU në Berlin.

“Të gjithë jemi thellësisht të tronditur. Nuk e kishim pritur këtë në këtë formë. Rezultati duhet pranuar natyrisht, pasi këto janë rregullat e demokracisë. Por me ditën e djeshme nuk ka ndryshuar vetëm Saksoni-Anhalti, por e gjithë Gjermania. Kjo është humbja më e rëndë zgjedhore që CDU-ja ka pësuar prej vitesh, madje prej dekadash. Kjo natyrisht do të duhet të ketë pasoja”, tha Merz.

Ai theksoi se CDU-ja nuk mund të vazhdojë thjesht rutinën e përditshme. Rezultati i zgjedhjeve ka shkaktuar tronditje të mëdha si në vend, ashtu edhe brenda CDU-së. Merz tha se do të përpiqet t’i përgjigjet seriozitetit të situatës, duke shtuar se rezultati zgjedhor prek edhe atë personalisht.

“Institucionet tona janë të forta dhe të qëndrueshme. Kushtetuta gjermane e mbron dhe garanton këtë rend, dhe qeveria federale që unë drejtoj do të sigurojë që Kushtetuta të zbatohet. Ky mesazh vlen edhe për miqtë tanë në Evropë dhe në të gjithë botën. Ne e dimë se Gjermania, për shkak të historisë së saj, mban një përgjegjësi të veçantë. Gjermania do të ruajë gjithmonë lidhjen e saj të fortë me Evropën”, shprehu kancelari gjerman, Friedrich Merz.

Kancelari Merz nuk po shqyrton pasoja personale për veten, pavarësisht rezultatit të dobët të CDU në zgjedhjet e landit Saksoni-Anhalt.

“Dorëzimi nuk është një opsion për mua. Të gjithë së bashku duhet të bëhemi më të mirë. Dhe po kërkoj mënyra se si mund ta arrijmë këtë. Bëhet fjalë që edhe brezat e ardhshëm të mund të jetojnë në liri, paqe dhe siguri. Dhe nga kjo përgjegjësi nuk do të largohem. Në javët dhe muajt e ardhshëm do të përpiqem ta bëj ndryshe politikën, ta bëj më mirë. Bindjet e mia themelore nuk ndryshojnë”, tha Merz.

Merz kishte thënë në fillim se do ta përgjysmonte AfD-në, ndërkohë që zgjedhjet në Saksoni-Anhalt përgjysmuan CDU-në e tij. Për Merzin, presioni sa vjen e rritet. Partia e ekstremit të djathtë Alternativa për Gjermani (AFD) fitoi zgjedhjet për parlamentin rajonal të Saksoni-Anhaltit me një epërsi të madhe, por nuk arriti shumicën absolute. CDU-ja u rendit në vendin e dytë, duke pësuar humbje të konsiderueshme.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Bisnezmeni Luan Muça ka reaguar pas konfliktit me armë në Vlorë duke dhënë versionin e tij për ngjarjen që ndodhi ditën e enjte.

Muça shprehu se ai kishte shkuar të sqarohej me biznesmenin Vasil Bedinaj për një pronë në Palasë dhe ka akuzuar këtë të fundit se e kishte pritur me persona të armatosur, të cilët sipas tij qëlluan me armë në momentin që ai po largohej nga ambientet e hotelit.

Kam heshtur deri tani, sepse në pozitën ku kam qenë e kam pasur të pamundur të flas dhe mendoj se publiku ka të drejtën ta dëgjojë të vërtetën drejtpërdrejt nga unë.

Që prej vitit 2019, kam vendosur të ndërmarr një investim në zonën e Palasës. Gjatë kësaj kohe, kam blerë në Palasë, nga shumë pronarë vendas, 97.000 m² tokë. Jam detyruar që, gjatë kësaj periudhe, pjesën më të madhe të tokës ta blej edhe nga dy herë.

Më datë 15.07.2021, kam aplikuar dhe kam marrë statusin e investitorit strategjik, mbështetur mbi një projekt të hartuar nga studioja ndërkombëtare EEA (Emre Arolat Architecture).

Në vitin 2022, mbi një pjesë të kësaj sipërfaqeje (26.000 m²), kam aplikuar për lejen e fazës së parë të ndërtimit të një hoteli me brand ndërkombëtar, me 5 yje.

Në vitin 2024, kam zbardhur lejen dhe kam filluar punimet për ndërtimin e këtij hoteli me brand ndërkombëtar.

Po në vitin 2024, kam bërë aplikim për fazën e dytë të këtij projekti.

Në mënyrë rastësore, nga rrjetet sociale, kam parë se ishte dhënë një leje në tokën që unë kam blerë dhe mbi të cilën ishte dhënë statusi i investitorit, sipas masterplanit të EEA Studio. Madje, po reklamohej për shitjen e njësive, apartamenteve apo vilave të ndryshme.

Pas kësaj, i jam drejtuar AZHT-së për të marrë më shumë informacion rreth kësaj çështjeje. Pas komunikimit që pata, më njoftuan se do të verifikoheshin të gjitha dokumentet e palëve dhe se, deri në momentin e përfundimit të verifikimit të dokumenteve, nuk do të kishte zbardhje të lejes së ndërtimit.

Pas rreth një ore, jam telefonuar nga shtetasi Vasil Bedinaj, i cili më kërkoi të mos i ekspozoja në AZHT pretendimet e mia mbi pronën time. Gjatë kësaj telefonate, u vendos që të takoheshim në Orikum, te hoteli i z. Bedinaj, për të diskutuar rreth kësaj situate. (Z. Bedinaj e kam njohur rreth një vit më parë, pasi ishte paraqitur në kantierin ku unë po ndërtoj në Palasë, duke kërkuar takim me mua në lidhje me disa pretendime që kishte për kufirin e pronës. Kur shkova atje, z. Bedinaj nuk ishte vetëm, por ishte i shoqëruar nga një numër i madh njerëzish të armatosur.)

Kështu, i shoqëruar nga familjarë të mi, kam shkuar, me ftesën e tij, në ambientet e biznesit të tij.

Pasi jemi takuar në Orikum dhe jemi ulur në tavolinë, sapo kam nisur t’i shpjegoj pretendimet e mia, z. Bedinaj e ka tensionuar situatën me pretendimet e veta, duke sharë dhe ofenduar.

Edhe pse nga kamerat që z. Bedinaj i ka servirur opinionit publik kjo nuk duket qartë, në këtë moment ai thirri njerëz të armatosur, të cilët ishin të pozicionuar në vende të ndryshme të ambienteve të tij.

Në këtë moment, situata ka degraduar dhe unë kam kuptuar se z. Bedinaj nuk më kishte thirrur për t’u sqaruar, por për të prodhuar skandalin e tij të radhës. Për këtë arsye, jam ngritur dhe kam ikur.

Duke dalë nga ambientet e z. Bedinaj, njerëzit që ai thirri qëlluan me armë ndaj nesh. Për sa më sipër, kërkoj nga Policia e Shtetit zbardhjen e kësaj ngjarjeje dhe identifikimin e plotë të grupit të qitësve.

Jam çuditur shumë që, gjatë kësaj situate, z. Bedinaj kishte qetësinë dhe përkujdesjen që, në të gjitha mediat mbi të cilat kishte ndikim, të shpërndante lajme të rreme, sipas të cilave unë i kisha vendosur gjobë, si dhe të shpërndante pamjet filmike nga këndet që ai dëshironte.

Kam mësuar këto ditë se nuk është hera e parë që z. Bedinaj manipulon opinionin publik për përplasjet e tij. Këtë gjë ka tentuar ta bëjë edhe në rastin tim.

Çuditërisht dhe paradoksalisht, të vetmit që e kanë besuar këtë gjë kanë qenë punonjësit e Policisë së Shtetit, të cilët më kanë mbajtur të ndaluar për 72 ore me akuzën e gjobëvënies ndaj z. Bedinaj.

Unë nuk mund të flas për veten time, pasi nuk e kam bërë kurrë më parë, sepse kam besuar se për njerëzit flasin punët dhe veprat e tyre.

Besoj se opinioni publik është i njohur me punët, brandet dhe kompanitë që kemi krijuar brenda dhe jashtë vendit.

Modestisht, mund të them se jam krijues dhe zhvillues i një konglomerati kompanish që operojnë në 4 kontinente, duke përfshirë Shtetet e Bashkuara, Indinë, si dhe vende si Italia,Senegali, Tunizia, Egjipti dhe, sigurisht, Ballkani, me një qarkullim vjetor multimilionësh.

Në këtë kontekst, fantazia e gjobës ndaj një personi me pantallona të shkurtra, i cili rrihet çdo vit me ndonjë turist, polic apo plazhist, është një fantazi dashakeqe e një grupi personash që mendojnë se, duke vjedhur pronat e të tjerëve, mund të bësh edhe para, të dalësh edhe burrë i mirë dhe të quhesh biznesmen.

Në fund, jam i gatshëm t’i vendos në dispozicion opinionit publik dhe mediave çdo dokument për të cilin kam shkruar në këtë reagim.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Ndërsa fenomeni i motit El Niño intensifikohet, qeveria britanike u bën thirrje qytetarëve të përgatiten për situata emergjente, duke mbajtur në shtëpi ushqime, ujë dhe pajisje të nevojshme për të përballuar disa ditë pa energji elektrike ose ujë të rrjedhshëm.

Ministrja britanike e Mjedisit, Ushqimit dhe Çështjeve Rurale, Angela Eagle, tha për ‘The Guardian’ se do të ishte e këshillueshme që qytetarët të siguronin rezerva ushqimore, në mënyrë që të mund të përballonin situata në të cilat mund të mbeten të bllokuar në banesat e tyre derisa të mbërrijnë ekipet e shpëtimit.

Por cilat janë produktet më të përshtatshme për t’u mbajtur në rezervë në një situatë të tillë?

Sipas profesoreshës Elizabeth Robinson, ekonomiste mjedisore në London School of Economics, familjet duhet të kenë në shtëpi ushqime dhe ujë të mjaftueshëm për rreth dy javë.

“U këshilloj qytetarëve të furnizohen me produkte që kanë afat të gjatë përdorimi, si drithërat, orizi dhe makaronat, si dhe ushqimet e konservuara. Këto produkte janë veçanërisht të përshtatshme pasi shumë prej tyre mund të konsumohen edhe pa u gatuar, në rast se mungon energjia elektrike”,tha Robinson.

Ajo rekomandon gjithashtu fasule dhe bishtajore të konservuara, peshk ose mish, fruta dhe perime të konservuara, si dhe qumësht me jetëgjatësi të madhe. Të gjitha këto produkte mund të kombinohen për të përgatitur vakte të thjeshta, të shijshme dhe ushqyese.

Ndërkohë, Departamenti britanik për Mjedisin, Ushqimin dhe Çështjet Rurale ka publikuar një “kit emergjence”, i cili përfshin një listë me ushqime dhe pajisje bazë që qytetarët këshillohen t’i kenë në shtëpi.

Lista përfshin një elektrik dore me bateri, një bankë portative energjie (power bank), një radio me bateri dhe bateri rezervë.

Gjithashtu, në kit duhet të përfshihen një çantë e ndihmës së parë, peceta të lagura, dezinfektues për duart, ujë i ambalazhuar, ushqime që nuk prishen dhe nuk kërkojnë gatim, si dhe një hapëse konservash.

Për familjet me foshnja ose fëmijë të vegjël, rekomandohet që të sigurohen edhe produkte të tilla si pelena dhe qumësht pluhur.

“Familjet që kanë mundësi financiare duhet t’i mbajnë këto furnizime në shtëpi, në rast të një emergjence”,theksoi profesoresha Robinson, duke paralajmëruar gjithashtu se përkeqësimi i kushteve klimatike mund të ndikojë në rritjen e çmimeve të ushqimeve.

“Mbretëria e Bashkuar është shumë e varur nga importi i frutave dhe perimeve dhe kemi parë tashmë se si kushtet ekstreme të motit në vende si Spanja dhe Afrika e Veriut mund të shkaktojnë mungesa dhe rritje të çmimeve. Në përgjithësi, orizi, kafeja, kakaoja dhe çaji mund të bëhen më të shtrenjtë, ndërsa çmimet e ushqimeve për kafshët pritet të rriten ndjeshëm”,përfundoi ajo.

El Niño është një fenomen natyror klimatik që lidhet me ndryshimet në erërat dhe temperaturat e ujërave në Oqeanin Paqësor. Ngrohja e pazakontë e sipërfaqes së oqeanit çliron sasi të mëdha nxehtësie në atmosferë dhe ndikon në modelet e motit në shumë pjesë të botës.

Të dhënat e fundit, të publikuara më 1 shtator, tregojnë se temperaturat e ujërave në rajonin qendror të Paqësorit, në zonën kryesore të El Niños, janë rreth 2.6 gradë Celsius mbi mesataren e 30 viteve të fundit.

Kjo vlerë është pranë niveleve më të larta të regjistruara në epokën e matjeve moderne. Në vitin 2015, devijimi arriti në rreth 3.1 gradë Celsius, ndërsa kulmi i fenomenit të atëhershëm ende nuk ishte arritur në këtë fazë të vitit.

Sipas mesatares së 14 modeleve klimatike, temperatura mund të arrijë një devijim prej rreth 4 gradësh Celsius në muajin nëntor.

Analisti i klimës Zick Hausfather ka deklaruar se të dhënat e marra nga studimet e koraleve, unazave të pemëve dhe dokumenteve historike sugjerojnë se asnjë fenomen El Niño gjatë mijëvjeçarit të fundit nuk ka arritur nivele të tilla.

El Niño klasifikohet përgjithësisht kur temperatura e sipërfaqes së detit në zonën përkatëse të Paqësorit është të paktën 0.5 gradë Celsius mbi mesataren.

Rekordi i temperaturës mund të thyhet në vitin 2027

Ky episod i El Niños vlerësohet të jetë ndër më të fuqishmit e regjistruar në historinë moderne dhe pritet të shtojë më tej nxehtësinë në një atmosferë që tashmë po ngrohet si pasojë e ndryshimeve klimatike.

Kombinimi i El Niños me ngrohjen globale mund të ketë pasoja të rëndësishme në mbarë botën. Sipas disa parashikimeve, viti 2027 mund të thyejë rekordin aktual dhe të bëhet viti më i ngrohtë i regjistruar ndonjëherë.

Sekretari i Përgjithshëm i OKB-së, António Guterres, ka paralajmëruar për rritjen e rrezikut nga ngjarjet ekstreme të motit.

“El Niño po bëhet gjithnjë e më i fortë para syve tanë. Shkenca nuk lë vend për dyshim: planeti ndodhet në ujëra të paeksploruara dhe këto ujëra po ngrohen. Bota është në zonën e rrezikut të ngjarjeve ekstreme të motit”,është shprehur Guterres.

Ai ka theksuar se sfida kryesore është përballja me rreziqet në rritje dhe forcimi i masave për veprim klimatik dhe mbrojtjen e popullsisë.

Edhe Sekretarja e Përgjithshme e Organizatës Botërore Meteorologjike, Celeste Saulo, ka paralajmëruar se El Niño mund të shkaktojë një “goditje të madhe” për shoqëritë dhe ekonomitë në mbarë botën.

“Ne tashmë po shohim përçarje dhe dëme të shkaktuara nga thatësirat dhe përmbytjet dhe presim që këto ndikime të intensifikohen ndërsa El Niño forcohet”,ka deklaruar Saulo.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Kryeministri Edi Rama ka publikuar në rrjetet sociale një tekst të gjatë, për të cilin sqaron se nuk është shkruar prej tij, por se është një nga ato shkrime që do të dëshironte t’i kishte shkruar vetë.

Rama e shoqëron postimin me një koment ironik, duke u bërë thirrje ndjekësve ta lexojnë, ndërsa teksti ngre akuza të forta.

Në tekst kritikohet ashpër ajo që përshkruhet si një “industri llumi”, e ngritur mbi shtrembërimin e fakteve, panikun, zemërimin dhe përdorimin e titujve apo videove të manipuluara për të nxitur reagime dhe për të gjeneruar klikime.

RRESHTAT MË POSHTË NUK I KAM SHKRUAR UNË, PO ËSHTË NJË NGA ATO RASTE KUR NJERIU THOTË: AH, SIKUR T’I KISHA SHKRUAR VETË…

Lexojini se do të gjeni shumë fytyra, zëra dhe mashtrime e dyfytyrësira nga jeta e përditshme para pasqyrave teknologjike

Hapësira publike është kthyer në një sistem kanalesh të ujërave të zeza dhe kutërbimi nuk është nën këmbët tona, por po ngrihet nga foltoret, nga titujt dhe nga goja e njerëzve që e dinë se po jashtënxjerrin plehra, në emër të “guximit”.

Kjo është një industri llumi, e ngritur mbi shtrembërimin, poshtërimin, panikun dhe tërbimin, ku njerëzit bosh kanë mësuar se, nëse arrijnë t’i bëjnë qytetarët të urrejnë, askush nuk do ta vërë re se ata vetë nuk kanë asgjë të dobishme për të ofruar. Nuk u duhen zgjidhje kur mund të prodhojnë armiq, as u duhet karakter kur turma është e etur për mizori ndaj shënjestrës njerëzore të radhës.

Ky kanibalizim funksionon sepse shumë njerëz janë përshtatur e rehatur duke jetuar në vorbullën e tij. Ata e dinë se fragmenti i videos është prerë për të mashtruar, se titulli është fabrikuar si armë, se akuza është fryrë, se zemërimi është inskenuar dhe se njeriu që po tërhiqet zvarritet nëpër baltë është një qenie njerëzore e katandisur në një leckë për klikime dhe reagime. E dinë se faktet po spërdridhen për të nxjerrë një ulërimë therëse dhe fundja e dinë fare mirë, se gënjeshtra është gënjeshtër. Ama u pëlqen, thjesht u shijon tërë spektakli që prodhon gënjeshtra.

Një mospajtim nuk lejohet më të mbetet thjesht një mospajtim. Dikush duhet patjetër të jetë i korruptuar, i paaftë, mashtrues, i kapur ose pjesë e ndonjë konspiracioni të hatashëm. Njerëzit marrin një copëz informacioni, i ngjisin përfundimin që u përshtatet bindjeve të tyre, e hedhin në vorbullën e internetit dhe ja ashtu, si me magji, diçka që nuk ka ndodhur kurrë pranohet si fakt.

Zyrtarët dhe nëpunësit publikë trajtohen në mënyra që do të ishin të papranueshme pothuajse kudo e kurdoherë tjetër, a thua se thjesht zgjedhja për t’i shërbyer publikut nënkupton pranimin e një abuzimi pa kufi.Kjo është ajo që duhet t’i neveritë njerëzit. Jo mospajtimi, por oreksi për të parë dikë të keqtrajtohet dhe prapëseprapë për ta shpërndarë gënjeshtrën për të. Oreksi për të parë një fqinj të shndërrohet në armik, sepse kjo të kënaq më shumë sesa të pranosh që bota është ca më e ndërlikuar se sa duket. Dhe më e keqja, lejimi i një frikacaku me kamerë, mikrofon, titull në dorë apo platformë në zotërim, që të fusë dorën në kraharorin tonë, t’u drejtohet instinkteve tona më të këqija dhe të na bindë se ato janë parime.

Shumë njerëz nuk kanë më bindje politike, po kanë vetëm një varësi toksike. U duhet zemërimi i radhës, zuzari i radhës, videoja e radhës dhe justifikimi i radhës për t’u ndjerë më të mirë se të tjerët, pa qenë aspak njerëz më të mirë dhe ndaj ia kanë dorëzuar zhurmës krejt ndërgjegjen e tyre!

Shërbimi publik nuk duhej të kthehej kurrë në një material për thertoren e besimit, në një skenë për ego të papërmbushura apo në karburant për një makineri që i shndërron njerëzit në armiq imagjinarë për disa klikime. Një nënë që lufton të mos i fiken dritat nuk ka nevojë për tërbim teatral. Një veteran që pret kujdesin që i takon nuk ka nevojë për një video të manipuluar. Një mësues që blen me paratë e veta mjetet e shkollës nuk ka nevojë për panik të fabrikuar. Njerëzit që po përpëliten nga kostoja e rritur e jetesës nuk kanë nevojë për frikacakë të radhës që ua shesin urrejtjen si aftësi udhëheqëse.

Dhe ju lutem, ma kurseni predikimin e kujtdo që noton gjithë javën në kanalizimet e qelbura dhe pastaj shfaqet duke kutërbuar nga ambicia personale. Ma kurseni drejtësinë e rreme të njerëzve që i bëjnë qytetarët më të zemëruar, më pak të ndjeshëm e më pak të ndershëm, po edhe më të manipulueshëm, teksa për vete hiqen sikur po i shërbejnë diçkaje më të madhe se uria e tyre e pangijshme për vëmendje.

Nëse politika e tyre ka nevojë për gënjeshtra që të marrë frymë, ajo meriton të mbytet. Nëse lëvizja e tyre ka nevojë t’i zhveshë njerëzit nga njerëzorja për të mbijetuar, ajo e ka vendin në kanalin e ujërave të zeza. Nëse ndikimi i tyre varet nga helmimi i njerëzve kundër njëri-tjetrit, ata nuk janë udhëheqës po vetëm pjesë qorre të këtij sistemi ujërash të zeza.

Në bisht fare, pyetja që mbetet është kjo: Çfarë je i gatshëm të bëhesh për të mposhtur njerëzit që të kanë thënë se duhet t’i urresh?

Nëse je gati të bëhesh gënjeshtar, frikacak, manipulues apo njeri që kënaqet duke parë njerëz të panjohur të zhvishen nga dinjiteti i tyre njerëzor, atëherë nuk e ke mundur kalbëzimin që thua se po lufton. Thjesht, je bërë pjesë e tij.

Brooks Williams, Administrator i Qytetit Ferris, TEXAS, SHBA

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Në prag të nisjes së vitit të ri shkollor, Ministrja e Arsimit, Mirela Kumbaro, ka zhvilluar një takim me drejtuesit e 200 shkollave në Tiranë, duke përcaktuar disa nga prioritetet për mbarëvajtjen e procesit mësimor.

Siguria në ambientet e shkollave, respektimi i etikës nga stafet pedagogjike dhe roli i punonjësve socialë ishin ndër çështjet kryesore të diskutuara. Një tjetër fokus ishte ndalimi i përdorimit të telefonave celularë, rregull që ministrja tha se do të zbatohet me më shumë rigorozitet, duke nisur nga vetë mësuesit.

Kumbaro u ndal edhe te Kodi i Etikës, i miratuar një vit më parë për mësuesit, oficerët e sigurisë dhe punonjësit e shërbimit psikosocial. Sipas saj, zbatimi i këtij kodi nuk lidhet vetëm me paraqitjen, por veçanërisht me mënyrën e komunikimit në mjediset shkollore.

Ministrja theksoi gjithashtu se dita e parë e shkollës do të ketë një tjetër qasje. Për herë të parë, përmes udhëzimit të ri për vitin shkollor, ajo do të shërbejë si një ditë njohjeje dhe prezantimi me shkollën, mësuesit, tekstet dhe bashkëmoshatarët.

Pjesë e masave për rritjen e sigurisë janë edhe kamerat inteligjente, të vendosura në 20 shkolla në Tiranë dhe Kamzë.

Sipas ministres, këto pajisje kanë mundësi të identifikojnë automatikisht situata apo elementë që mund të përbëjnë rrezik. Sistemi mund të detektojë, ndër të tjera, tymin e cigares, objekte të kategorizuara si të rrezikshme, si doreza, armë apo thika, si dhe fytyra të personave të raportuar si me rrezikshmëri.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Momenti kur një sulm ajror izraelit goditi zonën e Nabatiyas, në jug të Libanit, u regjistrua nga kamera e një televizioni, ndërsa një gazetar dhe kameramani i tij po raportonin drejtpërdrejt nga vendi i ngjarjes.

Si pasojë e sulmit u plagosën korrespondenti i televizionit Al-Manar, Ali Shbib, dhe kameramani që e shoqëronte. Të dy ndodheshin në një distancë të shkurtër nga vendi i goditjes kur ndodhi shpërthimi.

Kamera kapi momentin e sulmit, ndërsa gazetari dhe kameramani u transportuan më pas në spitalin Sheikh Ragheb Harb, ku morën ndihmën mjekësore.

WATCH: A Lebanese reporter was injured yesterday during a live broadcast while covering an Israeli strike in Nabatieh.

He was a bit too close to the site of the strike.

He is in stable condition.pic.twitter.com/QeRiisfWjq

— Clash Report (@clashreport)September 7, 2026

Sipas informacioneve të raportuara, gjendja shëndetësore e të dy të plagosurve është e qëndrueshme.

Agjencia Kombëtare e Lajmeve e Libanit raportoi se një prej sulmeve ajrore kishte në shënjestër një parking në qytetin e Nabatiyas. Nga goditja u dëmtuan disa ndërtesa, ndërsa disa automjete u përfshinë nga flakët.

Sipas të njëjtit burim, avionët luftarakë izraelitë kryen një seri sulmesh ajrore në zona të ndryshme.

Që prej 2 marsit, Izraeli ka intensifikuar operacionet e tij ushtarake në territorin libanez.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Një incident i frikshëm ndodhi në Turqi, ku një vajzë rreth 5 vjeçe për pak sa nuk u godit nga një tramvaj, por u shpëtua në momentet e fundit nga një kalimtar.

Pamjet tregojnë një grup njerëzish duke pritur në një kalim për këmbësorë, ndërsa një tramvaj po kalonte.

Në një moment, vajza e vogël hyri papritur në shinat e tramvajit, duke rrezikuar të përplasej me mjetin që po afrohej.

Falë reagimit të shpejtë të një kalimtari, tragjedia u shmang. Burri e kapi vajzën për dore dhe e tërhoqi menjëherë larg shinave, vetëm pak sekonda para se tramvaji të kalonte.

Për fat të mirë, nga incidenti nuk raportohet të ketë pasur të lënduar.

🚨 A split-second decision. A life saved forever.

In Samsun, Türkiye, a vigilant security guard became a hero when a 5-year-old girl suddenly ran toward the tram tracks and jumped into the path of an approaching tram. With only moments to react, the guard rushed forward and…pic.twitter.com/UsP0Q9lJbS

— Kaptan Hindustan™ (@KaptanHindustan)September 4, 2026

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Lewis Hamilton ka pranuar se shanset e tij për titullin kampion në Formula 1 janë pothuajse shuar, ndërsa pas Çmimit të Madh të Italisë kritikat e tij ndaj Ferrarit dhe Charles Leclerc u bënë edhe më të forta.

Gara në Monza rezultoi një tjetër zhgënjim për shtatë herë kampionin e botës. Hamilton e përfundoi garën vetëm në vendin e gjashtë, ndërsa bashkëpiloti i tij Charles Leclerc u tërhoq pas një aksidenti të rëndë në xhiron e dytë. Por problemet për Hamilton nisën që në xhiron e parë.

Në kthesën e parë të shikanës, britaniku tentoi të parakalonte Leclerc, por u shty jashtë piste dhe humbi disa pozicione, duke zbritur deri në vendin e 10-të. Hamilton ishte i bindur se Leclerc nuk i la hapësirën e nevojshme.

Pas garës, ai nuk e fshehu zhgënjimin dhe drejtoi gishtin edhe nga drejtuesi i Ferrarit, Fred Vasseur.

“Unë nuk garoj pisët. Gjithmonë kam garuar pastër dhe me drejtësi dhe gjithmonë kam lënë hapësirë.”

Hamilton shtoi se problemi, sipas tij, nuk qëndron vetëm te pilotët, por nis nga drejtimi i skuadrës.

“Në fund të fundit, kjo vjen nga lart. Fillon me Fred-in dhe pastaj përcillet poshtë.”

Situata në kampionatin botëror është përkeqësuar ndjeshëm për Hamilton. Pas Monzës, ai ndodhet 76 pikë pas Kimi Antonellit, i cili triumfoi në mënyrë spektakolare në garën italiane, pasi ishte nisur nga vendi i 19-të.

Me vetëm 10 gara të mbetura, Hamilton beson se Ferrari ka humbur shumë kohë duke mos marrë vendime më të qarta për menaxhimin e dy pilotëve.

“Është shumë vonë për ato vendime. Shumë, shumë javë vonë”,deklaroi Hamilton, duke iu referuar mundësisë që Ferrari ta kishte favorizuar më herët në luftën për titull.

Britaniku pranoi se diferenca me Antonellin, së bashku me ritmin e Mercedes, e bën rikthimin në garën për titull jashtëzakonisht të vështirë.

Një nga kritikat më të forta të Hamilton ishte mungesa e rregullave të qarta mes pilotëve të Ferrarit.

Ai e krahasoi situatën me periudhën e tij te Mercedes, ku, sipas tij, skuadra kishte rregulla të përcaktuara qartë për mënyrën se si duhej të silleshin pilotët gjatë garave.

“Kur isha te Mercedes, kishim rregulla të shkruara për mënyrën se si duhej të garonim. Këtu nuk ka rregulla. Kjo është diçka që ndoshta duhet të ndryshojë”,tha Hamilton.

Kritikat vijnë në një moment delikat për Ferrarin. Leclerc tashmë ndodhet 112 pikë pas Antonellit, ndërsa pas rezultatit të Monzës, vetë Vasseur pranoi se skuadra mund të marrë në konsideratë favorizimin e Hamiltonit në garat e ardhshme.

“Rezultati i kthesave një-dy nuk është i mirë për skuadrën”,tha Vasseur.

Ai la të kuptohet se Ferrari tani mund të duhet të marrë një vendim më të qartë për prioritetet e saj në kampionat.

Ndërkohë, Kimi Antonelli shkroi historinë në Monza duke fituar Çmimin e Madh të Italisë pas një rikthimi të jashtëzakonshëm nga vendi i 19-të në nisje.

Piloti i Mercedesit u ngjit në majë të podiumit përpara shokut të skuadrës George Russell dhe Max Verstappen të Red Bull.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Shqipëria, më 3 shtator, ndaloi importin e mishit nga Brazili, sepse është konsideruar një produkt i pasigurt për shëndetin e njeriut.

Por, para këtij bllokimi, për 20 vite qytetarët shqiptarë kanë konsumuar mish nga Brazili të ngarkuar me baktere, por edhe me prezencë të lartë antibiotikësh. Kjo, pasi shumë herë kontenierët me mish të rrezikshëm kanë kaluar doganat shqiptare pa iu nënshtruar një kontrolli të plotë nga AKU-ja.

Në vitin 2025, shqiptarët nuk kanë konsumuar vetëm mish pule dhe derri me salmonelë, por edhe mish me ngarkesë të lartë antibiotikësh. Saktësisht, në këtë vit, një sasi prej 2.700 kg mish pule të ngrirë (2.7 tonë), e etiketuar si “Kofsha pule me shpatulla të ngrira”, rezultoi me prezencë të lartë të medikamentit veterinar Doxycycline.

Ky produkt, pasi u importua nga tregtarët e mishit, u hodh menjëherë në treg, duke siguruar fitimin e tyre dhe duke vënë në rrezik shëndetin e konsumatorëve. Në dyqanet e produkteve me origjinë shtazore apo në supermarkete, ky mish na prezantohet si një produkt që i ka kaluar të gjitha testet e AKU-së. Por e vërteta nuk qëndron kështu, pasi AKU-ja e realizoi inspektimin atëherë kur kofshat e pulës kishin mbërritur tashmë në tryezën e konsumatorit.

Në atë kohë, masat e marra nga AKU-ja, pas njoftimit të konsumatorëve me qëllim kthimin e produktit të blerë, i cili kishte datë skadence 13.09.2026, ndaj subjektit u mor masa administrative “gjobë”, në vlerën 300.000 lekë.

Antibiotiku Doxycycline përdoret te shpendët për trajtimin e infeksioneve bakteriale, përfshirë infeksionet e shkaktuara nga Mycoplasma dhe E. coli. Ky ilaç lejohet të përdoret te shpendët vetëm nëse respektohet doza e përcaktuar, në mënyrë që mbetjet e tij në mish të mos tejkalojnë nivelet e lejuara.

Në këtë rast, sipas rezultateve laboratorike, niveli i antibiotikut në kofshat e pulës nga Brazili e kalonte kufirin prej 100 mikrogramë/kg, i cili, sipas tekstit, lejohet në BE. Mishi i pulës që konsuamuan shqiptarët rezultoi me 107 mikrogramë/kg.

Kjo vlerë tregon se kofshat e pulës me mbetje të antibiotikut mbi kufirin e lejuar nuk duhet të kishin kaluar doganën. Nëse AKU-ja do të kishte reaguar në kohë, mishi i pulës i konsideruar i rrezikshëm duhet të ishte asgjësuar ose kthyer në vendin e origjinës, ku ishte prodhuar.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.