Punë në Gjermani

Rikthimi i Princ Harry dhe Meghan Markle në Britaninë e Madhe nuk nënkupton rikthimin e tyre në detyrat mbretërore.

Mbreti Charles ka dhënë një direktivë për zyrtarët e lartë të qeverisë, Forcave të Armatosura dhe përfaqësuesit e Kurorës, duke sqaruar se Duka dhe Dukesha e Sussex vijojnë të konsiderohen persona privatë.

Letra, e dërguar nga Lord Chamberlain me urdhër të mbretit, vjen pas vendimit të çiftit për t’u rikthyer në Britani dhe pas disa kërkesave për sqarime lidhur me mënyrën se si duhet të trajtohen nga institucionet.

“Nuk ka asnjë ndryshim në statusin e tyre”

Në dokument theksohet se Harry dhe Meghan u tërhoqën nga detyrat e tyre si përfaqësues të monarkut në janar të vitit 2020 dhe që prej atëherë nuk konsiderohen anëtarë aktivë të familjes mbretërore.

Pallati Mbretëror sqaron se kjo situatë mbetet në fuqi, ndërsa çifti vazhdon të jetë financiarisht i pavarur dhe të gëzojë të drejtën për të mbrojtur jetën e tij private.

Gjithashtu, titujt “His Royal Highness” dhe “Her Royal Highness” mbeten të pezulluar dhe nuk do të përdoren. Aktivitetet bamirëse të Harry dhe Meghan konsiderohen çështje private dhe nuk zhvillohen në emër të Kurorës.

Ata nuk mund të përdorin adresat mbretërore

Direktiva konfirmon se Harry dhe Meghan nuk përfaqësojnë familjen mbretërore dhe nuk kryejnë detyra zyrtare. Pozicioni i tyre konsiderohet i ngjashëm me atë të qytetarëve normalë që kanë aktivitete tregtare dhe bamirësie.

Pallati kërkon në këtë mënyrë të vendosë një ndarje të qartë mes angazhimeve të çiftit dhe detyrave zyrtare që kryhen nga anëtarët aktivë të familjes mbretërore.

Çfarë ndodh me sigurinë dhe fondet publike?

Letra trajton edhe çështjen e sigurisë së Harry dhe Meghan. Çështjet operative që lidhen me mbrojtjen e tyre duhet të adresohen te autoritetet përkatëse të policisë.

Ndërkohë, çdo pyetje nga institucionet shtetërore apo publike lidhur me trajtimin që duhet t’u ofrohet çiftit, veçanërisht në rastet kur mund të kërkohet përdorimi i fondeve publike, duhet t’i drejtohet Pallatit Buckingham.

Korrespondenca dhe çështjet administrative që lidhen me Sussex duhet të dërgohen drejtpërdrejt në zyrën e tyre, e cila funksionon në mënyrë të pavarur nga Oborri Mbretëror.

Pse ishte e nevojshme ndërhyrja e Pallatit?

Zyrtarët e Pallatit thonë se direktiva nuk sjell ndonjë ndryshim të ri, por synon të sqarojë përfundimisht statusin e çiftit pas rikthimit të tyre në Britani.

Harry dhe Meghan janë rikthyer në vend rreth dy javë më parë së bashku me dy fëmijët e tyre. Princ Archie dhe Princesha Lilibet pritet të nisin shkollën në Britani këtë javë.

Rikthimi i çiftit ka nxitur edhe spekulime për një angazhim më të madh të tyre në aktivitete bamirësie në Britani, por Pallati ka bërë të qartë se këto aktivitete nuk përbëjnë një rikthim në detyrat mbretërore.

Marrëveshja e Sandringham mbetet në fuqi

Në thelb, direktiva e mbretit Charles përcakton se, pavarësisht rikthimit në Britani, marrëveshja e Sandringham, e arritur pas largimit të Harry dhe Meghan nga detyrat mbretërore në vitin 2020, mbetet në fuqi.

Çifti mund të vijojë aktivitetet personale, tregtare dhe bamirëse, por nuk përfaqëson Kurorën, nuk kryen detyra zyrtare dhe nuk trajtohet institucionalisht si anëtarë aktivë të familjes mbretërore.

Me këtë sqarim, Mbreti Charles duket se kërkon t’i japë fund çdo paqartësie rreth një rikthimi të mundshëm institucional të Harry dhe Meghan në familjen mbretërore.

Prania e tyre në Britani mund të bëhet më e përhershme, por statusi i tyre zyrtar mbetet i pandryshuar që prej “Megxit”.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Kryeministri Edi Rama ka zhvilluar sot një takim në Universitetin e Vlorës, ndërsa më pas është ndalur në Parkun Aulona, përgjatë bulevardit kryesor të qytetit.

Sipas burimeve të korrespondentit të Top Channel Mikel Marsi, gjatë vizitës në këtë hapësirë, Rama ka deklaruar se Parku Aulona do të kthehet në një ambient publik.

Sipas tij kjo do të sjellë shndërrimin në një lulishte dhe hapësirë të gjelbër në shërbim të qytetarëve të Vlorës.

Projekti synon që kjo zonë të marrë një funksion të ri urban dhe të jetë një hapësirë e aksesueshme për banorët, në një nga zonat qendrore të qytetit.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Prokuroria e Tiranës ka kërkuar masën e sigurisë “arrest me burg” për këngëtarin Jozefin Marku, i arrestuar në lidhje me dhunimin e 26-vjeçarit Eduard Kuçi.

Burime bëjnë me dije për gazetaren e Top Channel, Anila Hoxha, prokurori i çështjes ka dorëzuar këtë të hënë në Dhomën Penale të Gjykatës së Shkallës së Parë të Tiranës kërkesën për caktimin e masës “arrest me burg” për Jozefin Markun dhe Kristjan Nikollin.

Të dyshuarit janë ndaluar nga Policia e Tiranës në kuadër të hetimeve për ngjarjen e dhunshme ndaj Kuçit. Marku dyshohet për disa vepra penale, ndërsa Nikolli, sipas hetimeve të policisë, dyshohet se ka qenë personi që drejtonte automjetin tip “Land Rover” të përdorur gjatë ngjarjes.

Ndaj Jozefin Markut rëndon akuza për “Heqjen e paligjshme të lirisë”, ndërsa 4 akuzat e tjera janë në verifikim e sipër.

Ndërsa ndaj Kristjan Nikollit, përveç veprave penale që lidhen me dhunimin e Kuçit, rëndon edhe akuza për “Përkrahjen e autorit të krimit” dhe “Mbajtjen pa leje dhe prodhimin e armëve, bombave ose minave dhe të municionit”.

Gjatë kontrollit të banesës së Nikollit, policia sekuestroi një sasi municioni, ndërsa u sekuestrua edhe automjeti “Land Rover”, i dyshuar se është përdorur në ngjarjen e dhunimit.

Sipas njoftimit zyrtar të policisë, Marku dhe Nikolli dyshohet se, në bashkëpunim me persona të tjerë ende të paidentifikuar, kanë dhunuar Eduard Kuçin, me pretendimin se 26-vjeçari kishte fyer Jozefin Markun në rrjetet sociale.

Në lidhje me ngjarjen janë shpallur në kërkim edhe A. H., 48 vjeç, dhe K. V., 27 vjeç, ndërsa vijojnë hetimet për identifikimin dhe kapjen e personave të tjerë që dyshohet se kanë marrë pjesë në ngjarje.

Tashmë pritet vendimi i gjykatës për masën e sigurisë. Sipas procedurës, seanca pritet të zhvillohet brenda 48 orëve nga paraqitja e kërkesës së Prokurorisë dhe do të zhvillohet me dyer të mbyllura.

Ndërkohë, Eduard Kuçi është marrë në pyetje nga policia në lidhje me ngjarjen, ndërsa materialet procedurale i janë referuar Prokurorisë së Tiranës për veprime të mëtejshme.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Ish-shefi i Formula 1, Bernie Ecclestone, është arrestuar, pasi dyshohet për mbajtje të paligjshme të një arme gjahu.

95-vjeçari britanik raportohet se u ndalua nga policia në Portugali, pasi avioni i tij privat u ul në një aerodrom pranë Lisbonës.

Sipas raportimeve të medias portugezeCorreio da Manhã, Ecclestone u ndalua në Tires Aerodrome, në Cascais, pranë Lisbonës, pasi gjatë një kontrolli iu gjet një armë gjahu në bagazhin e tij.

Mësohet se ndalimi i tij ka ndodhur gjatë një operacioni rutinë të policisë së aeroportit. Deri tani, Policia e Sigurisë Publike e Portugalisë (PSP) nuk ka dhënë një deklaratë zyrtare lidhur me rastin.

Ky nuk do të ishte rasti i parë që Ecclestone përballet me probleme për shkak të armëve.

Në vitin 2022, miliarderi britanik u ndalua në São Paulo të Brazilit, teksa po përgatitej të hipte në avionin e tij privat drejt Zvicrës. Edhe atëherë, autoritetet i gjetën një armë në bagazh.

Ecclestone pranoi në atë kohë se arma ndodhej në bagazhin e tij, por deklaroi se nuk kishte qenë në dijeni se e kishte me vete.

Pas ndalimit, ai u lirua pasi pagoi garancinë dhe u lejua të udhëtonte drejt Zvicrës.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Gazetarja e njohur Iva Tiço ka nisur këtë të hënë një rrugëtim të ri në programin “Në Shtëpinë Tonë” në Top Channel, ku do ta shohim nga e hëna në të premte, në këndin e gatimit me Alban Musën.

Këtë herë, Iva do të lërë pas gazetarinë për t’iu bashkuar atmosferës së kuzhinës, duke sjellë receta, shije dhe momente të veçanta për teleshikuesit.

“Shumë kënaqësi që do jemi të dy bashkë “Në Shtëpinë Tonë”. Nga shtëpia ime, erdhëm “Në Shtëpinë Tonë” , vetëm ti mund të më nxirrje nga shtëpia dhe nga ajo rehatia dhe nga luksi që kisha pasur këto dy-tre vitet e fundit”, u shpreh Tiço.

Prania e saj në krah të Alban Musës do të sjellë një tjetër dinamikë në këndin e gatimit, me shumë humor, biseda dhe sigurisht receta për t’u provuar në shtëpi.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Asambleja e Përgjithshme e Kombeve të Bashkuara votoi pak ditë më parë në mbështetje të një rezolute të paraqitur nga disa vende afrikane, e cila synonte miratimin e një harte që e paraqet kontinentin në përmasa më të mëdha nga sa shfaqet në harta konvencionale të botës.

Rezoluta, që pretendon të ofrojë një “paraqitje më të saktë” të masave tokësore të kontinenteve të globit, u përkrah  nga 164 vende, ndërsa Shtetet e Bashkuara votuan kundër dhe gjashtë shtete të tjera abstenuan. Harta e re-e njohur si projeksioni hartografik Equal Earth-“është një alternativë e përshtatshme për përmirësimin e saktësisë së paraqitjes hartografike të botës”, thuhet në rezolutë.

Ministri i Jashtëm i Togos, Robert Dussey, tha se kjo  rikonfirmon realitetin afrikan. Por, si ndryshon harta e re nga versioni tradicional dhe përse SHBA-ja kundërshtoi? OKB-ja u ka beri thirrje shteteve anëtare të miratojnë një hartë të re në vend të projeksionit tradicional Mercator, i përdorur prej shekujsh dhe qe u hartua për lundrimin detar nga hartografi flamand Gerardus Mercator në vitin 1569.

Ky projeksion i kushtonte rëndësi paraqitjes së saktë të formave dhe këndeve të masave tokësore, por madhësitë e tyre relative shpesh paraqiteshin në mënyrë jo të saktë- pjesërisht për shkak të vështirësisë së paraqitjes së një globi tredimensional në një sipërfaqe dydimensionale. Ai i zmadhoi rajonet veriore dhe i ngjeshi ato pranë Ekuatorit, duke bërë që Europa dhe Amerika e Veriut të dukeshin shumë më të mëdha, ndërsa Afrika dhe Amerika e Jugut të dukeshin më të vogla.

“Ndryshimi i hartave, padyshim, nuk e ndryshon botën”, tha tha ministri i Jashtëm francez Jean-Noel Barrot. “Megjithatë korrigjimi i një paraqitjeje të shtrembëruar është tashmë një akt i së vërtetës”, shtoi ai. Rezoluta nuk është detyruese, por synon të nxisë ndryshime në hartat që përdoren si standard në mbarë botën.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Ministri i Jashtëm i Bosnje e Hercegovinës, Ellmedin Konakoviç, njoftoi të hënën se pothuajse i gjithë personeli diplomatik i Ambasadës së Bosnjës në Serbi do të tërhiqet, si përgjigje ndaj veprimeve të zyrtarëve serbë pas vdekjes dhe varrimit të kriminelit të dënuar të luftës, Ratko Mlladiç.

Konakoviç tha se në Beograd mund të mbeten vetëm ambasadori dhe konsulli, pasi për emërimin dhe shkarkimin e tyre vendos Presidenca e Bosnjës, ndërsa pjesa tjetër e stafit do të tërhiqet.

Sipas tij, shërbimet konsullore pritet të transferohen te ambasadat e Bosnje e Hercegovinës në Zagreb dhe Podgoricë.

Ai e arsyetoi vendimin me zhvillimet në Serbi pas vdekjes së Mlladiçit, përfshirë varrimin, ceremoninë përkujtimore dhe mesazhet që janë shfaqur në publik.

“Po të mundesha, që sot do t’i ndërprisja marrëdhëniet diplomatike me Serbinë. Ajo që mund të bëj është të punoj që marrëdhëniet t’i zvogëloj në minimumin e mundshëm”, tha Konakoviç.

Ai tha se “nuk ishte befasuar” nga prania e zyrtarëve të Republikës Sërpska në varrimin e Mlladiçit në Beograd dhe paralajmëroi se do të kërkojë sanksione “në të gjitha adresat” ndaj individëve që morën pjesë në ceremoni, përfshirë anëtaren e Presidencës së Bosnjës, Zhelka Cvijanoviç.

Ministri i Jashtëm i Serbisë, Marko Gjuriç, në një reagim në Facebook ndaj paralajmërimit të Konakoviçit, e akuzoi kreun e diplomacisë së Bosnjë e Hercegovinës për “hipokrizi” dhe tha se ai duhet “fillimisht t’i përmendë emrat e viktimave serbe, t’i dënojë krimet e kryera ndaj tyre dhe të shpjegojë pse në Sarajevë vazhdojnë të glorifikohen komandantë të dënuar”.

Ministri i Jashtëm i Bosnje e Hercegovinës tha se “alarmi i fundit” ishte mesazhi “Drejt Potoçarit”, i shfaqur në ndeshjen e Crvena Zvezdës, duke vlerësuar se ngjarje të tilla përbëjnë vazhdim të glorifikimit të krimeve të luftës dhe autorëve të tyre.

Gjatë derbit mes Crvena Zvezdës dhe Partizanit më 6 shtator, tifozët në tribunën veriore të stadiumit “Rajko Mitiç” shfaqën një portret të madh të Mlladiçit me mbishkrimin: “Drejt Potoçarit”.

Portreti i tij qëndroi i ekspozuar në tribunën veriore gjatë gjithë ndeshjes.

Konakoviç paralajmëroi gjithashtu një ofensivë diplomatike ndaj Bashkimit Evropian dhe partnerëve të tjerë ndërkombëtarë. Ai tha se do të dërgohen një sërë notash dhe letrash diplomatike, përmes të cilave do të kërkohet reagim i qartë ndaj qëndrimit të Serbisë ndaj krimeve të luftës të vërtetuara me vendime gjyqësore.

Sipas tij, Bosnja nuk do t’u përgjigjet më në mënyrë pasive përpjekjeve për rishikimin e fakteve për krimet e luftës dhe do t’i përdorë më intensivisht kanalet diplomatike për të paraqitur, siç tha ai, të vërtetën për ngjarjet e luftës së fundit.

Në ceremoninë e varrimit të Mlladiçit në Beograd morën pjesë zyrtarët më të lartë të entitetit serb të Bosnjës, Republika Sërpska.

Në mesin e tyre ishin anëtarja e Presidencës së Bosnjës, Zhelka Cvijanoviç; presidenti i Republikës Sërpska, Sinisha Karan; kryeministri Savo Miniç; kryetari i Kuvendit të Republikës Sërpska, Nenad Stevandiç; si dhe disa ministra të Qeverisë së këtij entiteti.

Nderime për Mlladiçin bënë edhe Millorad Dodik, kryetar i Aleancës së Socialdemokratëve të Pavarur, kryetari i Banjallukës, Drashko Stanivukoviç, si dhe përfaqësues të Partisë Demokratike Serbe në opozitë, Branko Blanusha dhe Marinko Bozhoviç.

Delegacioni i Bashkimit Evropian në Bosnje e Hercegovinë paralajmëroi më 7 shtator se “çdo glorifikim i kriminelëve të luftës, mohim i gjenocidit dhe revizionizëm është në kundërshtim me vlerat më themelore evropiane dhe nuk ka vend as në BE, as në vendet kandidate për anëtarësim”.

Për ceremoninë e varrimit me nderime ushtarake dhe shtetërore kishin reaguar më herët edhe senatorët amerikanë Jeanne Shaheen, Chuck Grassley dhe Keith Self, të cilët u bënë thirrje autoriteteve në Serbi dhe Republikën Sërpska të distancohen nga ceremonia.

“Ratko Mlladiç ishte kriminel lufte dhe arkitekt i gjenocidit në Srebrenicë, ku u vranë më shumë se 8.000 burra dhe djem boshnjakë”, thanë senatorët në një deklaratë të përbashkët.

Ata paralajmëruan se glorifikimi i tij do të përbënte përdhosje të kujtimit të viktimave dhe një test për gatishmërinë e Serbisë dhe Republikës Sërpska për t’u shkëputur nga trashëgimia e krimeve të luftës.

Komisionarja evropiane për Zgjerim, Marta Kos, anuloi ndërkohë një vizitë të planifikuar në Serbi, duke vlerësuar se glorifikimi i një personi të dënuar për krime lufte dhe gjenocid në Bosnje e Hercegovinë është i papajtueshëm me vlerat mbi të cilat mbështetet rruga evropiane.

Ish-komandanti i Ushtrisë së Republikës Sërpska, Mlladiç, të cilin Tribunali i Hagës e dënoi për gjenocid dhe krime të tjera lufte në Bosnje e Hercegovinë, u varros në Beograd të hënën, më 7 shtator, me nderime ushtarake dhe shtetërore.

Më 5 shtator, në Shtëpinë e Ushtrisë së Serbisë në Beograd, për Mlladiçin u mbajt edhe një ceremoni përkujtimore, ku morën pjesë, ndër të tjerë, ministri serb i Drejtësisë, Nenad Vujiç, dhe presidenti i Republikës Sërpska, Sinisha Karan.

Në ditët pas vdekjes së Mlladiqit, në disa qytete të Serbisë dhe në entitetin Republika Sërpska u organizuan tubime në kujtim të tij.

Tubimi më i madh u mbajt në Banjallukë më 1 shtator.

Në narrativat e disa mediave në Beograd dhe Banjallukë, Mlladiç është paraqitur si viktimë e Tribunalit, i cili, sipas tyre, nuk e lejoi të kurohej në Serbi, ndërsa vendimi gjyqësor ndaj tij dhe viktimat e krimeve për të cilat u dënua pothuajse nuk janë përmendur./REL

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Një e re ka vdekur si pasojë e plagëve të marra nga zjarri, pasi më 6 shtator në fshatin Poterq të Klinës, një person dyshohet se i kishte vënë flakën krevatit ku ajo qëndronte.

Sipas Policisë së Kosovës, i dyshuari, i cili dyshohet se ka probleme me shëndetin mendor, më pas kishte sulmuar me një mjet të fortë edhe nënën e tij, duke u shkaktuar të dyja grave lëndime të rënda trupore.

Viktimat fillimisht ishin dërguar në Spitalin Rajonal të Pejës dhe më pas në QKUK për shkak të natyrës së lëndimeve. Policia dega në Pejë ka njoftuar se i dyshuari është arrestuar dhe, me vendim të prokurorit, i është shqiptuar masa e ndalimit prej 48 orësh.

Megjithatë, për shkak të gjendjes së rënduar psikike, ai është vendosur në repartin e psikiatrisë në Spitalin Rajonal të Pejës, nën përkujdesjen e personelit mjekësor dhe mbikëqyrjen e zyrtarëve policorë.

“Stacioni Policor në Klinë, me datën 06.09.2026, ёshtё njoftuar se nё fshatin Poterq-Klinё, njёperson me probleme tё shëndetit mendor, fillimisht ia ka vёnё flakёn krevatit nё tё cilin qëndronte motra e tij, e mё pas nё dhomёn tjetёr e ka sulmuar me mjet tё fortё nёnёn e tij, tёcilave iu ka shkatuar lëndime tё rёnda trupore.

Policia e Kosovës menjёherё ka dalё nё vendin e ngjarjes, ku ёshtё arrestuar i dyshuari, ndёrsaviktimat fillimisht janё dёrguar nё spitalin rajonal nё Pejё, e mё pas pёr shkak tё natyrёs sёlëndimeve, janё dёrguar nё QKUK Prishtinё.

Sot, me datёn 07.09.2026, Policia ёshtё njoftuar se vajza e cila kishte lëndime nga zjarri, nuk kamundur t’iu mbijetojë plagёve dhe ka ndёrruar jetё, kёtё e ka konstatuar ekipi mjekësor. Personit tё dyshuar me vendim tё prokurorit tё shtetit i ёshtё shqiptuar masa e ndalimit prej 48 orёsh, mirëpo pёr shkak tё gjendjes sё tij tё rёnduar psiqike, ёshtё vendosur nё spitalin rajonal nё Pejё, nё repartin e psikiatrisё nё përkujdesje tё personelit mjekёsor, nёn mbikëqyrjen e zyrtarёve policorë”, thuhet në njoftimin zyrtar.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Gjykata Themelore në Prishtinë pas aprovimit të marrëveshjes për pranim fajësie, ka dënuar me 2 vjet burgim me kusht dhe 6 mijë euro gjobë këngëtarin Besart Kelmendi i njohur si Gjesti, lidhur me akuzën për tri vepra penale “Armëmbajtje pa leje”, “Kanosje” dhe “Asgjësim apo dëmtim i pasurisë”.

Por ajo që ka tërhequr vëmendjen, është reagimi i këngëtarit menjëherë pas vendimit, ku shfaqet i kënaqur dhe duke kërcyer.

“Gjithmonë i drejtë, gjithmonë kam shkëlqyer, ylli kurrë nuk zbehet”, janë këto fjalët që Gjesti thotë menjëherë pasi u shpall vendimi.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Pas kërkesave të vazhdueshme drejtuar qeverisë si pasojë e humbjeve të krijuara nga kursi i këmbimit dhe paketave të cilave i konsiderojnë jo të duhura, shoqata e manifakturës i është drejtuar qeverisë me një sërë kërkesash të reja.

Rritja e kostove të punës dhe prodhimit, mungesa e fuqisë punëtore por më kryesorja zhvillimet e kursit të këmbimit i kanë nxitur eksportuesit t’i paraqesin institucioneve gjashtë kërkesa prioritare për t’u përfshirë në Paketën Fiskale 2027.

Në kërkesën drejtuar ministrit të Financave dhe Ministrisë së Ekonomisë dhe Inovacionit për dijeni, Shoqata argumenton se industria prodhuese po kalon një periudhë të vështirë ndërsa kërkon 6 pika kryesore lehtësuese.

-Përllogaritja e tatimit mbi të ardhurat nga paga të nisë mbi nivelin e pagës minimale dhe që ky prag të ndryshojë automatikisht sa herë ndryshon paga minimale;

-Kompensimin e pjesshëm të kontributeve të sigurimeve shoqërore që paguan punëdhënësi për sektorët prodhues me intensitet të lartë punësimi;

-Rritja e normës së amortizimit fiskal nga 20% në 40%,

-Rishikimi i tarifave doganore për lëndët e para.

-Pjesa e fitimit të kompanisë që riinvestohet në aktivitetin prodhues të përjashtohet nga tatim-fitimi;

– Krijimi i një skeme të posaçme grantesh për teknologjinë dhe automatizimin.

Sipas shoqatës këto kërkesa vijnë në përputhje dhe me procesin e integrimit të cilat do t’u kërkojnë plotësimin e kriteret dhe përshtatjen me standardet.

Pas pandemisë eksportuesit regjistruan rënie të ndjeshëm të vlerës së eksportuesve si pasojë e rënies së kontratave të porosive dhe humbjeve të shkaktuar në kursin e këmbimit. Vetëm në 2 vitet e fundit humbja në vlerë regjistrohet në më shumë se 17% apo rreth 145 mld lekë mallra më pak të eksportuara.

90% e kësaj rënie vjen më shumë nga sektori i manifakturës dhe materialet e ndërtimit të cilat përkatësisht në vlerë kanë humbur 22.4 mld lekë dhe 34.7 mld lekë.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.