Punë në Gjermani

Drejtoria e Përgjithshme e Doganave vijon të konsolidojë performancën e saj pozitive në mbledhjen e të ardhurave doganore, duke shënuar rezultate të rëndësishme edhe gjatë muajit gusht 2026.

Gjatë muajit gusht, të ardhurat doganore arritën në 22.8 miliardë lekë, rreth 1.7 miliardë lekë më shumë krahasuar me gushtin e vitit 2025, ose rreth 18 milionë euro më shumë.

Një nga treguesit më të rëndësishëm të muajit është rekordi historik në zhdoganimin e karburantit. Në gusht 2026, konsumi mujor i karburantit kaloi 80 mijë tonë, duke dhënë një kontribut të rëndësishëm në performancën e të ardhurave doganore.

Rritja e të ardhurave është mbështetur nga performanca pozitive e disa zërave kryesorë:

Akciza neto: +502 milionë lekë, e ndikuar veçanërisht nga karburantet (+264 milionë lekë) dhe cigaret (+187 milionë lekë);

TVSH në import: +1.1 miliardë lekë, ku kontributin kryesor e kanë dhënë karburantet e importit (+741 milionë lekë), produktet e tjera (+161 milionë lekë) dhe autoveturat e përdorura (+146 milionë lekë);

Taksa doganore: +85 milionë lekë, me rritje të ndikuar ndër të tjera nga importet e veshjeve, mishit dhe konstruksioneve metalike;

Renta minerare: +8 milionë lekë, e ndikuar kryesisht nga rritja e sasive të eksportit të mineraleve të tjera.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Një dekadë më parë, Anjezë Gonxhe Bonjaxhi, gruaja që u bë nënë për njerëzimin, u shenjtërua nga Papa Françesku.

Në Meshën e Kanonizimit për Shën Terezën më 4 shtator 2016, Papa e quajti përcjellëse të mëshirës hyjnore që ndriçon errësirën që na rrethon. Misioni i saj vuri në dukje Ati i Shenjtë, “mbetet dëshmi e afërsisë së Zotit me më të varfrit.

Në 5 shtator, Kisha Katolike feston Shën Nënë Terezën, datën që shënon edhe ndarjen e saj nga jeta. Misionaret e Bamirësisë e kremtojnë këtë ditë me agjërim dhe lutje.

Ndërsa në Tiranë, në këtë përvjetor, u ekspozuan dorëshkrime në gjuhën shqipe të nobelistes, që tregojnë një raport të ngushtë emocional të Shenjtores për Shqipërinë dhe shqiptarët.

Aktiviteti u organizua në Drejtorinë e Përgjithshme të Arkivave, ku të pranishme ishin misionare të Urdhrit Nënë Tereza, që shtrin veprimtarinë e tij në rreth 100 vende.

Edhe personalitete të politikës dhe jetës akademike kujtuan sot Shën Terezën përmes shprehjeve të saj dhe mrekullive që iu njohën Shenjtores që u përkul mbi të varfrit, mbi të sëmurët dhe mbi çdo njeri që kishte nevojë për mbështetje dhe dashuri.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Jozefin Marku ka reaguar për Top Channel pas qarkullimit të videos ku ai dhe disa persona të tjerë shfaqeshin duke dhunuar ish-konkurrentin e Përputhen, Edi Kuçi.

Marku thotë se kjo ngjarje, e ndodhur në autostradën Tiranë-Durrës, është një ‘skenë aktrimi’, dhe se asgjë nuk ka ndodhur në realitet.

“Asgjë s’ka ndodhur, jemi aktorë, e kemi bërë vetë”, u shpreh ai në një komunikim përmes mesazheve me redaksinë e Top Channel Web.

I pyetur në lidhje me lëshimin e urdhër-arrestit nga Prokuroria e Pejës, ai e cilëson si ‘fake’ dhe të pavërtetë.

“Janë fake, nuk kam arsye të jem atje”, pretendon Marku.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Java e tretë e Serie A sjell një nga përballjet më të forta të kampionatit, me Interi që pret Napoli në një duel që rikthen në skenë rivalitetin e sezonit të kaluar për titullin kampion.

Interi e ka nisur sezonin në mënyrë pozitive dhe kërkon të vijojë me rezultate të mira edhe në këtë përballje të rëndësishme.

Zikaltrit synojnë të shfrytëzojnë avantazhin e fushës dhe të marrin një tjetër rezultat që do t’i japë besim skuadrës në javët e para të kampionatit.

Në krahun tjetër, Napoli vjen në këtë takim nën presion. Skuadra e drejtuar nga Massimiliano Allegri pësoi një humbje të papritur në javën e kaluar ndaj Comos dhe tashmë nuk mund të përballojë një tjetër hap fals.

Sfida mes Interit dhe Napolit pritet të jetë një test i rëndësishëm për të dyja skuadrat, me kampionati që sapo ka nisur, por ku pikët në përballje direkte mund të kenë peshë të madhe në garën për kreun e tabelës.

Lautaro 56′ / Politano 50′, Hojlund 53′

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Një 67-vjeçar nga Arizona u arrestua pasi dyshohet se u soll në mënyrë agresive gjatë një fluturimi të kompanisë American Airlines, duke detyruar avionin të devijonte nga itinerari dhe të kryente një ulje emergjente në Baltimore.

Sipas Policisë Shtetërore të Merilendit, Arthur Ludin u arrestua pasi avioni u ul në Aeroportin Ndërkombëtar Baltimore/Washington. Gjatë incidentit, ai u lidh në sediljen e tij me shirit ngjitës, ndërsa duart iu lidhën me zinxhirë.

Incidenti ndodhi në fluturimin AA 618, i cili ishte nisur nga Dallas me destinacion Newark, sipas FBI-së dhe American Airlines.

Një prej pasagjerëve, Juan Mejia, ish-oficer i zbatimit të ligjit, tha se situata u tensionua rreth tre të katërtat e fluturimit. Sipas tij, 67-vjeçari nisi të ofendonte stafin e kompanisë dhe pasagjerët e tjerë, duke përdorur gjuhë fyese dhe raciste, si dhe komente fyese ndaj disa grave që ndodheshin në rreshtin pas tij.

Mejia dhe pasagjeri tjetër, Richard Olenick, thanë se ndërhynë pasi Ludin u bë fizikisht agresiv. Avioni devijoi në Aeroportin Ndërkombëtar Baltimore/Washington rreth orës 22:15, sipas Administratës Federale të Aviacionit (FAA), e cila po heton gjithashtu incidentin.

Dy pasagjerët që ndërhynë thanë se qëndruan pranë 67-vjeçarit derisa oficerët e policisë hipën në avion dhe e morën atë në paraburgim.

Pas arrestimit të Ludin, fluturimi vijoi normalisht drejt Newark, njoftoi American Airlines.

67-vjeçari u akuzua për sjellje të pahijshme dhe sulm të shkallës së dytë për incidentet e ndodhura në bordin e avionit, sipas Policisë së Autoritetit të Transportit të Maryland.

Hetimi për incidentin gjatë fluturimit vijon nga FBI-ja.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Një grup hakerash ka publikuar në rrjetin e errët rreth 1.4 milionë skedarë të vjedhur nga qeveria e qytetit të Berlinit, pasi skadoi afati për pagesën e një shpërblimi prej rreth 2 milionë eurosh.

Sipas transmetuesit publik rajonal RBB, të dhënat janë bërë të disponueshme për shkarkim në disa grupe. Mes materialeve të publikuara ndodhen edhe dokumente personale, përfshirë certifikata pune, oferta dhe vlerësime të punonjësve.

“Argëtohuni, gjuetarë të të dhënave”, shkruan grupi i hakerëve në njoftimin e tij.

Sulmi kibernetik ndaj institucioneve të Berlinit ndodhi më 14 gusht, duke detyruar shërbimet komunale, veçanërisht ato që lidhen me strehimin dhe mjedisin, të shkëputeshin përkohësisht nga rrjeti. Për disa ditë, qytetarët nuk mundën të përfundonin aplikimet apo pagesat për përfitimet e strehimit.

Në fund të gushtit, kryebashkiaku i Berlinit, Kai Wegner, konfirmoi se qyteti ishte bërë objekt i një tentative shantazhi pas sulmit kibernetik dhe deklaroi se autoritetet “nuk do t’i nënshtroheshin” kërkesave të hakerëve.

Grupi Rhysida, i cili sipas mediave gjermane ka marrë përgjegjësinë për sulmin ndaj Bibliotekës Britanike në Londër në vitin 2023, është lidhur edhe me këtë sulm. Në rastin e Bibliotekës Britanike, hakerët kërkuan 20 bitcoin, ndërsa pas refuzimit të pagesës publikuan rreth 500 mijë skedarë me të dhëna personale të vizitorëve, abonentëve dhe stafit.

Publikimi i të dhënave të Berlinit vjen vetëm pak javë para zgjedhjeve komunale të 20 shtatorit. Autoritetet kanë bërë të ditur se procesi zgjedhor nuk është prekur nga sulmi kibernetik.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Banorët e Levanit në Fier, teksa presin komisionin për vlerësimin e dëmeve, tregojnë të dëshpëruar tmerrin që përjetuan një ditë më parë nga flakët e fuqishme.

Zjarri u afrua pranë banesave dhe bizneseve, duke shkaktuar dëme të mëdha dhe panik mes familjeve, raporton korrespondenti i Top Channel Neritan Trifoni.

Një i moshuar, teksa qëndron pranë një magazine ku ai prodhonte koshere për bletët, i bën thirrje autoriteteve që të kryhet sa më parë vlerësimi për dëmet e shkaktuara.

“Këta thonë kur ka nevojë populli, jemi në gatishmëri… Ejani dhe shikoni gjendjen, bëni proces verbal. Po ullinjtë? U dogjën prapë ullinjtë, ku të vete unë”, shprehet ai, teksa i komunikohet se verifikimet nga grupi do të kryhet ditën e martë.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Në Meshën e Kanonizimit për Shën Terezën më 4 shtator 2016, Papa e quajti përcjellëse të mëshirës hyjnore që ndriçon errësirën që na rrethon. Misioni i saj vuri në dukje Ati i Shenjtë, “mbetet dëshmi e afërsisë së Zotit me më të varfrit”.

Në 5 shtator, Kisha Katolike feston Shën Nënë Terezën, datën që shënon edhe ndarjen e saj nga jeta. Misionaret e Bamirësisë e kremtojnë këtë ditë me agjërim dhe lutje.

“Me gjak, unë jam shqiptare. Me shtetësi, jam indiane. Me besim, unë jam një murgeshë katolike. Sipas profesionit tim, unë i përkas botës”,shprehej Anjezë Gonxhe Bojaxhiu, që lindi në 1910 në Shkup nga prindër shqiptarë.

Në 1929, Nënë Tereza shkoi si misionare në Kalkuta të Indisë. Më tej, themeloi shtëpi misionare në vendet e kampit socialist, përfshirë republikat e ish-Bashkimit Sovjetik, Kubën dhe vende të tjera, duke përhapur mesazhin e saj të mëshirës përtej kufijve ideologjikë.

Deri në vitin 1990 ajo kishte hapur 456 qendra në më shumë se 100 vende të botës. Figura e Nënë Terezës u bë e njohur në mbarë botën, ku fitoi dashurinë e të gjithëve dhe në 1979 mori Nobelin për Paqe. Ndërsa në tetor 2003, Papa Gjon Pali II e shpalli të Lume, duke e vendosur figurën e saj në altarin e Kishës si shembull të gjallë të dashurisë dhe përkushtimit ndaj më të varfërve.

Sot Urdhri i Nënë Terezës mbi 100 mijë vullnetarë të cilët veprojnë në rreth 100 vende të botës. Personalitete të politikës dhe jetës akademike kujtuan sot Shën Terezën përmes shprehjeve të saj dhe mrekullive që iu njohën Shenjtores që u përkul mbi të varfrit, mbi të sëmurët dhe mbi çdo njeri që kishte nevojë për mbështetje dhe dashuri.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Leon Avdullahu ka realizuar një supergol për Hoffenheimin në sfidën ndaj Borussia Dortmundit, duke i dhënë avantazhin skuadrës së tij në fundin e pjesës së parë.

Mesfushori shqiptar u shfaq protagonist në minutën e 45-të, kur goditi nga distanca dhe e dërgoi topin në rrjetë, duke mposhtur portierin e Dortmundit.

Një goditje e bukur dhe e fuqishme nga jashtë zone i dha Hoffenheimit avantazhin 1-0, me vendasit që e mbyllën pjesën e parë në epërsi.

Avdullahu ishte titullar në këtë përballje, ndërsa goli ndaj Dortmundit është një moment i rëndësishëm për mesfushorin shqiptar në Bundesligë.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Sezoni i ri i Kategorisë së Parë ka nisur sot me disa rezultate interesante, teksa gjashtë skuadra kanë zbritur në fushë për javën e parë të kampionatit 2026-2027.

Në sfidën më të rëndësishme, Kukësi e ka nisur në mënyrën më të mirë aventurën e re, duke mposhtur Besëlidhjen me rezultatin 2-0.

Verilindorët e zgjidhën ndeshjen që në pjesën e parë, me Demirçanin që zhbllokoi rezultatin dhe Pjeshkën që dyfishoi avantazhin.

Ndërkohë, Bylisi dhe Sopoti u ndanë në barazim, në një përballje që mbeti e hapur deri në fund. Të dyja skuadrat gjetën nga një gol, duke marrë nga një pikë në startin e sezonit.

Pa fitues përfundoi edhe dueli mes Ilirisë dhe Pogradecit, me skuadrat që nuk arritën të gjenin rrugën e rrjetës dhe e mbyllën takimin në shifrat 0-0.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.