Author: bot videobot

Një ish-oficere burgu në Britani është liruar para përfundimit të dënimit, pasi kishte krijuar një marrëdhënie të paligjshme me një të burgosur të dënuar për një krim të rëndë.

Charlotte Winstanley, 28 vjeçe, u dënua me 30 muaj burg pasi pranoi akuzën për keqpërdorim të detyrës publike, lidhur me marrëdhënien me të dënuarin Jabhari Blair, 30 vjeç, në burgun HMP Lindholme, në South Yorkshire.

Sipasmediave britanike, marrëdhënia mes tyre nisi ndërsa Winstanley punonte si oficere burgu. Çifti zhvillonte takime të fshehta në ambiente të mbyllura të burgut dhe shkëmbenin mesazhe intime.

Në një prej mesazheve, Winstanley i kishte thënë Blair se po lutej që të mbetej shtatzënë me fëmijën e tij. Ndërkohë, i dënuari i shkruante asaj komente intime për pamjen e saj.

Gjykata e Kurorës në Sheffield mësoi se ish-oficerja nuk kufizoi shkeljet vetëm te marrëdhënia personale me të burgosurin.

Pas sekuestrimit të telefonit të saj në nëntor 2022, autoritetet zbuluan komunikime ku Blair e udhëzonte të blinte sende për të, mes tyre karta SIM.

Winstanley dyshohet se i kishte dhënë gjithashtu informacione konfidenciale për të burgosur të tjerë, përfshirë të dhëna mjekësore, si dhe informacione mbi një kontroll të kryer në qelinë e Blair.

Ajo u takua edhe me nënën e të dënuarit jashtë burgut dhe i dha informacione për planet për transferimin e tij në një institucion tjetër.

Edhe pasi u pezullua nga detyra në nëntor 2022, Winstanley u regjistrua si vizitore e Blair pasi ai u transferua në burgun HMP Ranby, në Nottinghamshire.

Gjatë seancës së dënimit, gjyqtari e cilësoi çështjen si jashtëzakonisht serioze.

Ai deklaroi se rasti ishte, me një diferencë të konsiderueshme, më i rëndi i këtij lloji me të cilin ishte përballur.

Blair ishte dënuar me 12 vjet e gjysmë burg për plagosjen me thikë të një personi gjatë një përleshjeje mes bandash në Bradford.

Winstanley kishte nisur punë në burg në moshën 22-vjeçare dhe kishte për detyrë të ruante rendin mes rreth 900 të burgosurve.

Avokati i saj, Khadim Al-Hassan, tha se ajo ishte “thellësisht e penduar” për veprimet e saj.

Pavarësisht dënimit prej 30 muajsh, Winstanley ka vuajtur vetëm rreth gjashtë muaj pas hekurave dhe është liruar sipas skemës së Home Detention Curfew, e cila lejon lirimin e parakohshëm të disa të dënuarve nën mbikëqyrje.

Ajo do të monitorohet përmes një pajisjeje elektronike dhe duhet të respektojë kushte të përcaktuara të lirimit.

Pas daljes nga burgu, ish-oficerja publikoi në TikTok një video nga momenti kur u prit nga familjarët dhe miqtë, të cilët e pritën me konfeti.

“Jeta vazhdon, pavarësisht sa shumë gabon apo sa herë rrëzohesh”, shkroi ajo në rrjetet sociale.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Eskorta kolumbiane e di që është gjithmonë në rrezik dhe se mund të kapet nga momenti në moment nga policia. Disa shoqe të saj janë arrestuar, por sërish ajo nuk tërhiqet. Rrëfen se e bën këtë punë nga nevoja për para’.

‘Kam dëgjuar për ta dhe nuk dua të gënjej. Mendoj se është e padrejtë. Kjo punë ka rreziqet e saj, por ju siguroj se askush nuk e bën nga dëshira dhe qejfi. Mendoj se është e padrejtë për ta që të arrestohen’ u shpreh eskorta

Vajza zbulon në këtë rrëfim të ndjerë se është nënë e një vajze të mitur vetëm 5-vjeçare. Tashmë, ajo është mjaft larg së bijës të cilën e mbajnë gjyshërit në Kolumbi.

‘Kam vetëm një arsye madhore se pse e bëj. Kam një vajzë në Kolumbi dhe dua ti jap asaj një jetë të mirë. Atë që unë nuk kam pasur. Kjo është arsyeja se pse e bëj. Ajo është 5 vjeçe. Kur unë jam jashtë ajo qëndron në Kolumbi. Qëndron me prindërit e mi, pasi është e sigurt atje dhe kujdesen shumë mirë për të. Para se të jem eskortë jam një mama dhe sigurisht që është pjesa më e vështirë të qëndroj larg saj, por duhet të bëj këtë punë për të’ u shpreh eskorta

‘Janë eskorta Korce dy nga njerëzit që unë njoh, s’mund t’i konsideroj miq, që janë në burg. Qëndroj me të njëjtën ide, nuk është e drejtë, pasi ata mbajnë familjen dhe ushqehen me këtë punë’ u shpreh eskorta

Avokatja që ka punuar nga afër me këto eskorta i konsideron problemet e tyre sociale para se të jenë penale. Sipas avokates, e dyta është pasojë e së parës, dhe jo nga burimi i një mendimi kriminal.

‘Kanë komunikime me familjaret, komunikime të vazhdueshme, për arsye se shumica e këtyre vajzave janë me fëmijë. Fëmijët mbahen nga nënat. Pra, është një dramë sociale’ u shpreh Suada Pucesta, avokate

Në Shqipëri është shumë e thjeshtë për të gjetur një eskortë, mjafton një telefon… A ka ardhur koha për një lloj qasje të re ndaj fenomenit…?

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Zhvillimi i shpejtë i Inteligjencës Artificiale po sjell pasoja të paparashikuara për konsumatorët. Rritja e kërkesës për çipa dhe komponentë të avancuar, të nevojshëm për qendrat e të dhënave që mbështesin sistemet e IA-së, është duke ushtruar presion mbi çmimet e smartfonëve, laptopëve, kompjuterëve dhe konsolave të lojërave.

Nëse planifikoni të blini një pajisje të re teknologjike gjatë këtij viti, duhet të përgatiteni për çmime më të larta dhe, në disa raste, për më pak alternativa në treg, thonë ekspertët. Arsyeja është kërkesa në rritje për gjysmëpërçues, pasi kompanitë po orientojnë një pjesë gjithnjë e më të madhe të kapaciteteve të prodhimit drejt industrisë së AI. Qendrat e të dhënave që trajnojnë dhe funksionojnë me modele të saj, kërkojnë sasi të mëdha procesorësh me performancë të lartë dhe module të avancuara memorieje.

Kjo po e vështirëson furnizimin e prodhuesve të pajisjeve elektronike për konsumatorët me disa prej komponentëve më të kërkuar. Pasojat e kësaj situate po ndihen veçanërisht te produktet që kërkojnë kapacitete të larta përpunimi dhe memorie, përfshirë smartfonët, notebookët, kompjuterët dhe video lojërat. Apple është një prej kompanive që ka paralajmëruar rritje të çmimeve, duke e lidhur këtë me kostot më të larta të komponentëve. Edhe kompani të tjera të mëdha, përfshirë HP, Dell dhe Nintendo, kanë rritur çmimet e disa produkteve të tyre.

Në Gjermani, shoqata e industrisë digjitale Bitkom vlerëson se çmimi mesatar i një smartfoni gjatë këtij viti mund të arrijë rreth 646 euro.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Filozofi i famshëm sufi, Idriz Shah, në përmbledhjen e korpusit të tij me tregime të marra nga rrëfenjat e Mulla Nastradinit, ka edhe një rrëfenjë shumë të shkurtër, por mjaft kuptimplotë. E titulluar “Pasqyra”.

Idriz Shah shkruan se kur Nastradini i njohur po ecte dikur i vetëm në një rrugë të shkretë, përpara këmbëve vuri re një send që shkëlqente anës rrugës.

Ishte një send i çuditshëm, i lëmuar dhe i ndritshëm. Mullai i famshëm nuk kishte parë kurrë më parë një pasqyrë. Pasi e mbajti në dorë, e ngriti përpara dhe menjëherë iu shfaq një fytyrë që e shikonte.

Nasrudini u step. E afroi sendin më pranë. Fytyra iu afrua. E largoi. Edhe fytyra u largua.

Ajo që ndodhej përballë tij nuk i pëlqeu aspak. Një fytyrë e çuditshme i dukej e shemtuar dhe madje, sa më gjatë e shikonte, aq më pak i pëlqente.

Më në fund, Nastradini e kuptoi, sipas mënyrës së tij, të gjithë misterin.

Ah! – tha ai. Tani e mora vesh përse dikush e ka hedhur këtë gjë tutje, anës rrugës, si të pavlerë.

Duhet të ketë qenë diçka vërtet e pakëndshme të shikoje këtë send që nuk thotë të vërtetën dhe, i lumtur që e kishte flakur tutje, vazhdoi rrugën e tij.

Nasrudini, siç dihet, ishte një njeri i mençur.

Ose, të paktën, aq i mençur sa të kuptonte se kishte disa gjëra që nuk ia vlen t’i mbash në shtëpi. Sidomos kur ato të tregojnë fytyrën tënde të vërtetë.

E gjitha kjo histori e Idriz Shahut m’u kujtua teksa përshkoja rrugën gjarpëruese anës Vjosës këtë fillim shtatori dhe dëgjoja spikeren e radios zyrtare që fliste plot pasion mbi një platformë të re me emrin “Pasqyra”.

Spikerja fliste mbi një pasqyrë moderne. Një pasqyrë dixhitale. Një pasqyrë e pajisur, natyrisht, edhe me platformë. Sepse në Shqipëri, edhe pasqyrat, përpara se të tregojnë fytyrën, duhet të kenë platformë.

Por kjo Pasqyrë “Made in Albania”, në kundërshti me atë të Nastradinit të famshëm, do të shohë, do të dëgjojë, do të kontrollojë, do të ndihmojë. Madje, do të zgjidhë edhe halle.

Sigurisht, është një pasqyrë magjike.

Me pak fjalë, do të bëjë të gjitha ato që nuk kanë mundur t’i bëjnë për tridhjetë e kusur vjet institucionet, ligjet, administrata, inspektoratet, ministritë, satelitët dhe gjithë ai numër i nderuar zyrtarësh që jeton prej kohësh nën kujdesin e Shtetit.

Dhe kjo, duhet pranuar, është një arritje. Sepse deri më sot kishim vetëm Shtetin, tani do të kemi edhe pasqyrën.

Mirëpo, me futjen e “Pasqyrës” në hallet tona, na lind një problem i vogël.

Çfarë do të ndodhë nëse Pasqyra fillon të tregojë gjëra që nuk na pëlqejnë?

Sepse pasqyrat, ndryshe nga spikeret, nuk kanë zakon të lexojnë tekstin që u jepet.

Nëse vendos një Pasqyrë përpara një pallati të paligjshëm që ngrihet buzë detit, të cilin as satelitët tanë të famshëm nuk e kanë parë dot, ajo e shkretë pasqyrë nuk sheh një “investim strategjik”.

Ajo shikon një pallat pa leje që sfidon Shtetin.

Nëse Pasqyrën tonë e vendos përballë një pylli të djegur, ajo e shkretë nuk sheh “zhvillim”, por sheh premtime boshe që nuk mundën të sigurojnë dot një kovë me ujë, jo më një avion.

Nëse e çon përpara një rruge të “përfunduar”, ajo nuk sheh “infrastrukturë në transformim”, por sheh tendera tmerrësisht të shtrenjtë.

E nëse dikush do të donte ta vendoste “Pasqyrën” përballë Shtetit? Apo, larg qoftë, përballë Parlamentit?

Atëherë kjo punë mund të bëhet vërtet interesante dhe kushedi se çfarë mynxyre do të shikonte Pasqyra jonë Magjike.

Por mendoj unë, modestisht, problemi i madh i shqiptarëve, në të vërtetë, nuk ka qenë kurrë mungesa e pasqyrave.

Problemi nuk ka qenë se nuk kemi pasur sy në ballë për të parë ç’bëhet në këtë vendin tonë të vogël.

Kemi parë pallate që rriten aty ku ligji thoshte se nuk mund të ndërtohej asgjë.

Kemi parë pyje që digjen, lumenj që thahen, bregdet që betonizohet dhe prona publike që bëhen papritur private.

Kemi parë tendera. Kemi parë koncesione.Kemi parë premtime.

Kemi parë edhe satelitë që, çuditërisht, shohin gjithçka… përveç asaj që do të donim të shihnin.

Por halli  ka qenë se, sa herë kemi parë diçka që nuk na ka pëlqyer, kemi vepruar si Nastradini me Pasqyrën.

“Nuk kemi dashur  të shohim një fytyrë të shëmtuar të realitetit!”

E pastaj kemi flakur pasqyrën dhe kemi vazhduar rrugën tonë.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

ChatGPT do t’u nënshtrohet rregullave më të ashpra të Bashkimit Europian, pasi Komisioni Europian e përfshiu në listën e shërbimeve digjitale me ndikim shumë të madh.

Ky është rasti i parë që një chatbot me inteligjencë artificiale vendoset nën këtë nivel mbikëqyrjeje. Në të njëjtën listë u shtuan edhe forumi Reddit dhe platforma e lojërave Roblox. Vendimi zbatohet për platformat që kanë më shumë se 45 milionë përdorues aktivë në muaj brenda 27 vendeve të Bashkimit Europian.

Të tria kompanitë kanë katër muaj kohë për të përmbushur detyrimet shtesë që burojnë nga Akti i Shërbimeve Digjitale. Ato duhet të vlerësojnë dhe të kufizojnë rreziqet sistemike të krijuara nga shërbimet dhe algoritmet e tyre. Kontrolli do të përfshijë përhapjen e përmbajtjeve të paligjshme, ndikimin negativ te të miturit, mirëqenien fizike dhe mendore të përdoruesve, të drejtat themelore, proceset zgjedhore dhe sigurinë publike. Për ta përfshirë nën këtë legjislacion, Komisioni Europian e ka klasifikuar ChatGPT-në si motor kërkimi. Ekspertët vlerësojnë se ky vendim krijon një precedent dhe mund të ndikojë në mënyrën se si do të mbikëqyren në të ardhmen të gjitha sistemet e mëdha të inteligjencës artificiale gjeneruese.

Vendimi vjen në një kohë kur Brukseli po forcon kontrollin ndaj kompanive të mëdha teknologjike, pavarësisht kundërshtimeve nga Shtetet e Bashkuara. Shkelja e detyrimeve mund t’i ekspozojë platformat ndaj gjobave të rënda financiare.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Zjarri i nisur mesditën e sotme në fshatin Vadhizë të Fierit ka marrë përmasa të mëdha vetëm pak orë pas shpërthimit të vatrës së parë.

Siç raporton korrespondenti i Top Channel Neritan Trifoni, flakët që nisën në fshatin Vadhizë, ka avancuar drejt Levanit, dhe sipas banorëve janë djegur tre shtëpi, një magazinë që prodhon koshere bletësh dhe i janë afruar një biznesi.

I favorizuar nga era e fortë dhe temperaturat e larta, zjarri është përhapur me shpejtësi, duke përshkuar sipërfaqe të mëdha me ullishte, pyje me pisha, shkurre dhe shtëpi.

Në orët e pasdites, flakët iu afruan dy lokaleve pranë liqenit, në zonën e Qafës së Koshovicës. Edhe pse ndërhyrja e forcave zjarrfikëse ka qenë e menjëhershme, era e fortë i ka shpërndarë flakët në një perimetër shumë të gjerë, duke e vështirësuar ndjeshëm ndërhyrjen nga toka.

Një lokal dhe një shtëpi e pabanuar janë djegur në zonën e Qafës së Koshovicës, ndërkohë ka nisur edhe ndërhyrja nga ajri.

Në ndihmë të forcave zjarrfikëse kanë mbërritur edhe dy helikopterë, të cilët kanë ndërhyrë nga ajri për neutralizimin e vatrave më problematike.

Flakët kaluan edhe rrugën nacionale Fier–Levan, duke detyruar policinë të bllokojë përkohësisht qarkullimin në këtë aks, për shkak të rrezikut dhe tymit të dendur.

Zjarri ka vijuar të përparojë duke djegur pyllin e dendur dhe është avancuar me shpejtësi në drejtim të fshatit Peshtan i Vogël.

Për shkak të afrimit të flakëve pranë zonave të banuara, forca të shumta policie kanë nisur evakuimin e banorëve. Rreth 15 familje janë larguar nga banesat e tyre, ndërsa efektivët vijojnë të monitorojnë zonat ku zjarri paraqet rrezik për banesat.

Ndërkohë, janë krijuar edhe disa vatra të tjera, çka e ka bërë situatën edhe më të vështirë për t’u menaxhuar.

Forca të shumta zjarrfikëse nga Fier, Mallakastra, Lushnja Vlora dhe Berati vijojnë të jenë në terren, së bashku me policinë dhe strukturat e tjera të emergjencave, në një betejë të vazhdueshme me flakët.

Operacioni për shuarjen e zjarrit vijon, ndërsa situata mbetet kritike për shkak të erës së fortë, e cila favorizon përhapjen e shpejtë të flakëve drejt zonave të tjera.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Rreziku i armëve bërthamore dhe balanca e frikës mes fuqive botërore ishte një nga temat e trajtuara në “Top Story”.

Fizikanti Fatos Klosi shpjegoi pse, pavarësisht arsenalit të madh bërthamor që zotërojnë shtetet më të fuqishme, këto armë nuk janë përdorur që nga Lufta e Dytë Botërore.

Ai foli gjithashtu për vendet që disponojnë armë bërthamore, situatën me Iranin dhe rolin që këto armë kanë luajtur si faktor parandalues në konfliktet ndërkombëtare.

“Katastrofa që do pasonte përdorimin e armëve bërthamore është e paimagjinueshme. Fuqitë e mëdha kanë armë bërthamore për ta shkatërruar disa herë botën. Kjo ka qenë edhe arsyeja pse nuk janë përdorur deri më tani. Ka qenë edhe Lufta e Ftohtë, që situatat kanë qenë shumë të acaruara dhe nuk i shkoi mendja për t’u përdorur. Situata që kemi sot është pak e çuditshme. Një president amerikan që ka filluar t’i pëlqejë vetja dhe pretendon shumë. Edhe NATO thotë që kjo nuk është zgjidhja. U bë një marrëveshje me Iranin. Mund të ketë pretendime që Irani ka armë bërthamore, por është pak larg saj. U bë një marrëveshje përpara se të vinte Trump që Irani të mos ketë armë bërthamore. Erdhi Trump në pushtet dhe u anulua ajo marrëveshje. Ishte një marrëveshje që ishin caktuar me detaje se cilat do të ishin kontrollet ndaj Iranit.

Armët bërthamore, hë për hë kanë vetëm vendet shumë të mëdha. SHBA-ja, Rusia, Kina, Anglia, Franca, India dhe Pakistani. Koreja e Jugut jo, kurse e Veriut po. Koreja e Veriut e ka thënë troç, ato armë i duhen që të mos e sulmojë njeri. Armët bërthamore krijojnë një rrezik që është tepër i madh, për të kërkuar që asnjë shtet të mos nisë luftë me to.

Deri tani ato kanë shërbyer për t’iu shmangur konflikteve. Kanë luajtur një rol sigurie”, u shpreh fizikanti.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Ethet e Nilit kanë hyrë edhe në Shqipëri pasi më 1 gusht është diagnostikuar rasti i parë me këtë sëmundje në qarkun e Korçës.

Për këtë ka reaguar edhe Ministria e Shëndetësisë, e cila është shprehur se ISHP po monitoron situatën.

Gjatë monitorimit sistematik dhe intensiv të infeksionit nga Virusi i Nilit Perëndimor (WNV) në vend, vetëm gjatë dhjetëditëshit të dytë të muajit gusht u evidentua rasti i parë për vitin 2026, në qarkun e Korçës. Që nga fillimi i muajit janar 2026, janë testuar 30 mostra të rasteve të dyshuara për infeksion nga WNV, të cilat kanë rezultuar negative. Rasti i evidentuar, përbën rastin e parë të konfirmuar në Shqipëri për vitin 2026.

ISHP po vijon survejancën epidemiologjike në njerëz, hetimin epidemiologjik dhe entomologjik të rastit të konfirmuar dhe monitorimin e situatës.

Në Shqipëri, infeksioni nga WNV është dokumentuar edhe më parë. Në vitin 2024 janë raportuar 107 raste të konfirmuara dhe 50 raste të mundshme, ndërsa në vitin 2025 janë raportuar 2 raste të konfirmuara.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Kryesuesi i seancës konstituive të Kuvendit të Kosovës, Avni Dehari, ka thirrur për 9 shtator vazhdimin e seancës, në përpjekje për t’i dhënë kohë arritjes së një marrëveshjeje politike që do të siguronte votat e nevojshme.

Dehari ka bërë të ditur se, meqë marrëveshja mes Lëvizjes Vetëvendosje dhe Lidhjes Demokratike të Kosovës nuk siguron aktualisht numrat e nevojshëm, ka vendosur t’u japë më shumë kohë palëve për të gjetur një zgjidhje.

“Deri atëherë pres që kjo marrëveshje të shoqërohet me përgjegjësi konkrete dhe me gatishmëri të deputetëve për t’i përmbushur detyrimet e tyre kushtetuese. Kosova nuk ka nevojë për një tjetër zvarritje, as për një tjetër krizë dhe aq më pak për një proces të ri zgjedhor”, ka shkruar Dehari.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Paramilitari serb Millorad Ulemek, i njohur si “Legija” është identifikuar si urdhërdhënësi për sulmin ndaj Familjes Jashari.

Ai është në mes të 35 personave, të cilët Prokuroria Speciale i ngarkon me krime lufte për vrasjen e 26 civilëve shqiptar në Lagjen e Jasharajve në Prekaz të Skënderajt.

Njësia e operacioneve speciale që mori pjesë në sulmin ndaj familjes Jashari në Prekaz është udhëhequr nga Milorad Ulemek, i njohur me nofkën “Legija”.

Sipas të dhënave të Prokurorisë Speciale të Kosovës, Ulemek kishte për detyrë, me kërkesë të posaçme, të drejtonte sulmin e drejtpërdrejtë ndaj shtëpisë së Shaban Jasharit.

Milorad Ulemek është dënuar në vitin 2007 për përfshirjen në vrasjen e kryeministrit serb Zoran Gjingjiq. Ai është dënuar gjithashtu për vrasjen e ish-presidentit serb Ivan Stamboliq dhe për tentativën e vrasjes së opozitarit Vuk Drashkoviq.

Prokuroria Speciale e Kosovës ka bërë të ditur se provat e siguruara gjatë hetimit kanë vërtetuar se, gjatë datave 5, 6 dhe 7 mars, në kuadër të rrethimit dhe sulmit ndaj familjes Jashari, janë vrarë 26 civilë shqiptarë.

Mes viktimave kishte edhe fëmijë, më i vogli vetëm pesë vjeç, si dhe gra dhe persona të moshuar.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.