Punë në Gjermani

Shqipëria dhe rruga e saj drejt Bashkimit Europian ishte një nga çështjet për të cilat u pyet në konferencën tradicionale për shtyp kryeministri grek Kyriakos Mitsotakis, në kuadër të Panairit të 90-të Ndërkombëtar të Selanikut.

I pyetur për marrëdhëniet me Tiranën dhe problemet që lidhen me pronat dhe të drejtat e minoritetit grek në Shqipëri, Mitsotakis tha se Athina mbështet perspektivën europiane të Ballkanit Perëndimor, por se çdo vend do të gjykohet veçmas për progresin e tij.

Kyriakos Mitsotakis, kryeministër i Greqisë u shpreh “Progresi që është bërë në regjistrimin e pronave dhe në mbrojtjen e të gjitha të drejtave nuk është i mjaftueshëm. Të jeni të sigurt se, në momentin e duhur, do të ushtrojmë të drejtat tona për t’u siguruar që të drejtat e minoritetit mbrohen plotësisht.”

Kryeministri grek theksoi se çështja nuk është vetëm dypalëshe, por lidhet edhe me respektimin e së drejtës europiane. Hapja dhe mbyllja e kapitujve të negociatave kërkon edhe miratimin e vendeve anëtare të Bashkimit Europian, ka thënë ai. Ndërsa për Maqedoninë e Veriut, kreu i qeverisë greke ishte edhe më i prerë, duke theksuar se nuk ka, në thelb, asnjë progres në negociatat europiane. Prandaj jemi në një fazë shumë më të hershme krahasuar me Shqipërinë, ka përfunduar ai.

Konferenca e shtypit erdhi një ditë pasi Mitsotakis shpalli nga Selaniku një paketë të gjerë masash ekonomike me rritje pagash dhe pensionesh, ulje taksash dhe ndihma për familjet, fermerët dhe bizneset, të cilat do t’i zbatojë nëse fiton edhe një mandat të tretë në pranverën e vitit 2027, kur janë parashikuar zgjedhjet parlamentare.

Partitë opozitare dhe disa media kritike ndaj qeverisë e pritën me skepticizëm fjalimin me masat ekonomike, ndërsa mijëra qytetarë, sindikata, fermerë dhe organizata protestuan në qendër të Selanikut të shtunën në mbrëmje kundër kostos së lartë të jetesës dhe politikave të qeverisë.

Përgjigja e plotë e Mitsotakis:

Për më shumë se 20 vjet, Greqia mbështet perspektivën europiane të Ballkanit Perëndimor.Megjithatë, shumë nga dallimet që na ndajnë, si me Shqipërinë, ashtu edhe me Maqedoninë e Veriut, mbeten të pazgjidhura. A mendoni se i keni menaxhuar siç duhet marrëdhëniet me Tiranën dhe Shkupin?Mos ndoshta keni treguar tolerancë të tepruar në çështje që lidhen, për shembull, me pronat e anëtarëve të Pakicës Kombëtare Greke në Shqipëri dhe me moszbatimin e Marrëveshjes së Prespës nga qeveria e Mickoskit?

Kyriakos Mitsotakis:Greqia është në mënyrë të qëndrueshme në favor të perspektivës europiane të Ballkanit Perëndimor. Por kjo nuk do të thotë – dhe me të drejtë e vini në dukje – se çdo rast nuk është i veçantë dhe se progresi i çdo vendi drejt Europës vlerësohet individualisht. Dhe, natyrisht, varet edhe nga gjykimi i të gjitha vendeve europiane se kur do të hapet dhe kur do të mbyllet çdo kapitull në kuadër të negociatave me Bashkimin Europian.

Me të drejtë theksuat se kemi ende çështje me pakicën kombëtare greke në Shqipëri, të cilat ia kemi bërë të ditura Shqipërisë. Nuk është i mjaftueshëm progresi që është bërë në evidentimin(regjistrimin) e pronave dhe në mbrojtjen e të gjitha të drejtave. Dhe të jeni absolutisht e sigurt se, në momentin e duhur, do të ushtrojmë të drejtat tona, në mënyrë që të jemi absolutisht të sigurt se të drejtat e pakicës mbrohen. Dhe e dini, kjo nuk është një çështje dypalëshe. Është një çështje që lidhet me të drejtën europiane, me mbrojtjen e të drejtave. Dhe, natyrisht, e njëjta gjë vlen edhe për Maqedoninë e Veriut, ku sigurisht nuk ka asnjë progres, në thelb, sa u përket negociatave europiane. Pra, atje, gjithsesi, jemi në një fazë shumë më të hershme në krahasim me atë që po ndodh me Shqipërinë.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Gianni Infantino nuk ka ndërmend të lëshojë postin e tij në krye të Federatës Ndërkombëtare të Futbollit. Kreu aktual i FIFA ka konfirmuar kandidaturën e tij për t’u rizgjedhur në postin e presidentit të këtij institucioni në zgjedhjet që do të mbahen në mars të vitit 2027.

Qeveria e futbollit botëror konfirmoi gjithçka përmes një komunikate për shtyp.

‘Presidenti i FIFA, në prill deklaroi se do të kandidojë për t’u rizgjedhur në postin e tij. Sigurisht, asgjë nuk ka ndryshuar. Z.Infantino do të garojë për të qenë sërish në krye-theksohet në komunikatën e FIFA.

Kohët e fundit pozitat e Gianni Infantinos janë tronditur fort për shkak të planit të tij për të shitur një kuotë të të drejtave komerciale të kompeticioneve të FIFA mes të cilave edhe Kupa e Botës te privatët. Konfederata të futbollit si UEFA apo CONCACAF e kanë kritikuar e ashpër Infantinon e madje kërcënuan me bojkot të kompeticioneve të FIFA, me UEFA që kërkoi edhe dorëheqjen e kreut aktual të organizmit më të lartë të futbollit botëror.

Por Gianni Infantino duket i palëkundur në qëndrimin e tij duke konfirmuar kandidaturën e tij për zgjedhjet e 2027.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Armando Broja është përfshirë në një moment tensioni pas përfundimit të ndeshjes së sotme të Burnleyt, teksa sulmuesi shqiptar u përplas verbalisht me një tifoz të skuadrës së tij.

Burnley humbi 2-1 në shtëpi ndaj Bristol City dhe pas vërshëllimave të tifozëve, situata u tensionua jashtë fushës. Broja, i cili ishte aktivizuar në pjesën e dytë, iu drejtua një prej mbështetësve që po e kritikonte, duke reaguar i irrituar ndaj komenteve të tij.

Në pamjet e publikuara në rrjetet sociale, sulmuesi i Kombëtares shqiptare shihet duke debatuar me tifozin, ndërsa në një moment dëgjohet të thotë: “Kam qenë jashtë për një vit, nuk kam luajtur për një vit.”

Nice striker least he’s been paid for a year@BurnleyOfficial#twitterclaretspic.twitter.com/XQJfVfSIZT

— Charlie Warrender (@Charwarrender19)September 5, 2026

Situata nuk shkoi më tej, pasi Broja u largua nga vendi i ngjarjes i shoqëruar nga një pjesëtar i sigurisë.

Reagimi i sulmuesit vjen në një periudhë kur Burnley po përballet me kritika nga tifozët për rezultatet dhe lëvizjet e klubit në merkato.

Humbja ndaj Bristol City ishte një tjetër zhgënjim për skuadrën, ndërsa Broja nuk arriti të ndryshonte fatin e takimit pas aktivizimit të tij.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Ka disa filma që mund t’i shohësh pafund dhe gjithmonë të emocionohesh njësoj. Për tifozët e Interit, një prej tyre është padyshim filmi i rikthimeve.

Kasti ndryshon, trajnerët ndryshojnë dhe vitet kalojnë, por skenari duket i njëjtë: fanellat zikaltër, një rezultat që duket i pamundur për t’u përmbysur dhe, kur gjithçka duket e humbur, një shpërthim në minutat e fundit.

Fitorja e fundit 3-2 ndaj Napolit, pas një disavantazhi prej dy golash, është vetëm kapitulli më i ri i një historie që Interi e ka shkruar disa herë. Më poshtë janë 10 nga rikthimet më të çmendura të zikaltërve.

1. Napoli – Inter 2-3: një tjetër mrekulli zikaltër

Përballja e parë direkte e vitit solli edhe fitoren e parë, por mënyra se si erdhi ishte tipike për Interin.

Pas një fillimi të mirë, Napoli arriti të marrë kontrollin dhe të kalojë në avantazh 2-0 në pjesën e dytë. Dukej se ndeshja po shkonte drejt një fundi të hidhur për zikaltërit.

Por Interi nuk u dorëzua. Lautaro Martínez realizoi një dopietë, ndërsa Marcus Thuram kompletoi përmbysjen me një goditje spektakolare me kokë.

Nga 0-2 në 3-2. Një tjetër rikthim për historinë.

2. Inter – Como: dy gola në fund dhe finalja e Kupës

Pas barazimit 0-0 në ndeshjen e parë të gjysmëfinales, gjithçka mbetej për t’u vendosur në San Siro.

Como dukej se po e kishte gjithçka nën kontroll pasi kaloi në epërsi 2-0 në fillim të pjesës së dytë. Por Interi reagoi.

Trajneri futi në fushë Hakan Çalhanoğlu dhe Petar Sučić, dhe ndryshimi dha menjëherë rezultat.

Çalhanoğlu shënoi dy herë, ndërsa Sučić vulosi barazimin. Dhe, siç i ka hije një historie zikaltër, goli vendimtar erdhi në minutën e 90-të.

Interi siguroi biletën për në Romë.

3. Inter – Barcelona: Acerbi bëhet sulmues dhe San Siro shpërthen

Një nga rikthimet më të pabesueshme në historinë evropiane të Interit.

Në gjysmëfinalen e Champions League, Barcelona ishte përpara në total dhe dukej se po i afrohej finales në Mynih.

Por në minutat e fundit ndodhi e pamundura.

Në kohën shtesë, Francesco Acerbi, një mbrojtës qendror, u shndërrua në sulmues dhe realizoi golin që e çoi rezultatin në 3-3.

Goli i tij në kohën shtesë kompletoi përmbysjen. Rezultati përfundimtar: 4-3 për Interin dhe një tjetër natë magjike në historinë evropiane të klubit.

4. Inter – Milan 4-2: derbi i përmbysur

Më 9 shkurt 2020, Milani dukej se kishte bërë gjithçka siç duhej në pjesën e parë të derbit.

Ante Rebić dhe Zlatan Ibrahimović i dhanë kuqezinjve një avantazh 2-0.

Por në pjesën e dytë, Interi shpërtheu.

Marcelo Brozović dhe Matías Vecino barazuan rezultatin, ndërsa Stefan de Vrij përmbysi gjithçka. Në fund, në minutën e 92-të, Romelu Lukaku realizoi me kokë dhe vendosi shifrën 4-2.

5. Inter – Tottenham 2-1: rikthimi në Champions League

Pas shtatë vitesh mungesë, Interi u rikthye në Champions League. Dhe debutimi ishte i denjë për historinë e klubit.

Tottenham kryesonte dhe koha po mbaronte.

Por në pesë minutat e fundit erdhi përmbysja.

Fillimisht Mauro Icardi realizoi me një volej spektakolar, duke shënuar golin e parë të karrierës së tij në Champions League.

Më pas, në minutat e fundit, Matías Vecino goditi me kokë dhe kompletoi rikthimin.

Një kthim në Champions League që nuk mund të kishte nisur në mënyrë më dramatike.

6. Bayern Munich – Inter 2-3: dy gola që ndryshuan historinë

Në raundin e 1/8 finaleve të Champions League, Interi duhej të përmbyste humbjen 1-0 të ndeshjes së parë ndaj Bayern Munichut.

Samuel Eto’o i dha Interit avantazhin, por bavarezët reaguan dhe e çuan rezultatin në 2-1.

Fillimisht ishte Wesley Sneijder, me një goditje të fuqishme. Më pas, Goran Pandev goditi në cepin e sipërm dhe kompletoi përmbysjen.

Zikaltërit kaluan më tej dhe vazhduan rrugën drejt një prej sukseseve më të mëdha në historinë e klubit.

7. Inter – Siena 4-3: tre pikë prej platini

Sezoni 2009/10, ai i Tripletës, solli një tjetër dramë të paharrueshme në San Siro.

Interi i José Mourinhos po luftonte për titullin dhe përballë kishte Sienën.

Ndeshja po shkonte keq. Siena kaloi disa herë në avantazh dhe, pak para fundit, Interi ishte në disavantazh 3-2.

Fillimisht erdhi një goditje dënimi nga Sneijder.

Më pas, Walter Samuel u shfaq në zonë dhe realizoi golin e fitores.

Nga një ndeshje që dukej e humbur, Interi mori tri pikë të arta në garën për Scudetton.

8. Dynamo Kiev – Inter: Milito dhe Sneijder në minutat e fundit

Një nga momentet që mund të kishte ndryshuar të gjithë historinë evropiane të Interit.

Në fazën e grupeve të Champions League, Interi i Mourinhos kishte marrë vetëm tri barazime dhe duhej të fitonte në Kiev.

Por Andriy Shevchenko ndëshkoi zikaltërit dhe Dynamo kaloi në avantazh.

Koha po mbaronte. Interi krijonte raste, por goli nuk vinte.

Diego Milito barazoi, ndërsa pak më pas Wesley Sneijder realizoi golin e përmbysjes.

Dy gola në fund që ndryshuan gjithçka.

Interi vazhdoi përpara në Champions League dhe, disa muaj më vonë, do të përfundonte duke ngritur trofeun në Madrid.

9. Inter – Roma 4-3: Superkupa e çmendur

Gushti i vitit 2006 solli një tjetër natë të jashtëzakonshme në San Siro.

Interi përballej me Romën në Superkupën e Italisë dhe pas vetëm 40 minutash dukej se trofeu po udhëtonte drejt kryeqytetit.

Por Interi i Roberto Mancinit nuk u dorëzua.

Patrick Vieira, Hernán Crespo dhe sërish Vieira e rikthyen Interin në 3-3.

Dhe aty foli klasi i Luís Figos.

Portugezi realizoi nga goditja e dënimit dhe i dha Interit trofeun.

10. Inter – Sampdoria 3-2: nëna e të gjitha rikthimeve

Dhe pastaj është rikthimi që, për shumë tifozë zikaltër, simbolizon të gjithë historinë e Interit të asaj epoke.

Sampdoria kryeson 2-0 dhe ndeshja po i afrohet fundit. Disa tifozë madje nisën të largoheshin nga stadiumi.

Por ata që u larguan humbën pesë nga minutat më të çmendura në historinë e klubit.

Në harkun kohor nga minuta e 88-të deri në të 93-tën, Interi realizoi tre gola.

Obafemi Martins, Christian Vieri dhe Álvaro Recoba përmbysën gjithçka.

Dhe lindi një nga ato histori që tifozët e Interit vazhdojnë t’i tregojnë brez pas brezi.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Pavarësisht numrit të lartë të turistëve që vizitojnë Kalanë e Gjirokastrës, Muzeu i Armëve brenda saj ka regjistruar vetëm rreth 18 mijë vizitorë.

Diferenca e madhe mes dy shifrave ngre pikëpyetje mbi aksesin e turistëve në këtë hapësirë muzeale. Një prej problematikave të evidentuara është edhe pagesa e veçantë e biletës për Muzeun e Armëve, e cila për turistët nënkupton një kosto shtesë, pasi hyrja në muze nuk përfshihet në biletën e Kalasë.

Kjo situatë duket se po ndikon në numrin e vizitorëve të Muzeut të Armëve, pavarësisht se ai ndodhet brenda një prej monumenteve më të vizituara të Gjirokastrës.

Me mbi 220 mijë vizitorë në Kala, vetëm një pjesë e vogël e tyre zgjedhin të paguajnë edhe për të vizituar muzeun, duke e kthyer çështjen e tarifimit në një nga faktorët që kërkon rishikim për të rritur aksesin dhe vizitueshmërinë.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Sa e përgatitur është Britania të mbrojë në 2026-ën një arkipelag ishujsh rreth 13 mijë km larg nga Londra, në afërsi të Antarktidës?

Në 1982, kur forcat argjentinase pushtuan ushtarakisht ishujt, ato mbroheshin nga 68 marinsa britanikë dhe 23 banorë britanikë që jetonin në ishuj dhe vepronin si forcë rezerviste. Fillimisht, Argjentina e pati pushtimin si shëtitje në park, dhe strategët ushtarakë dhe politikë argjentinas menduan se Britania nuk do të dërgonte forcat e saj në anën tjetër të botës për t’i mbrojtur ishujt, që tashmë kanë në afërsi edhe rezerva të mëdha nafte dhe po eksplorojnë me një kompani britanike dhe një izraelite për nxjerrjen e afro 1.7 miliard fuçive naftë.

U deshën 74 ditë që trupat e dërguara nga Thatcher-i të mposhtnin argjentinasit, që u dorëzuan para fuqisë ushtarake britanike. Argjentina pagoi një çmim të lartë prej 665 ushtarësh të vrarë, ndërkohë nga pala britanike humbën 255 ushtarë.

Britanikët nxorën mësime nga lufta e vitit 1982, dhe mësimi ishte se është më e vështirë të çlirosh ishujt e pushtuar sesa t’i mbrosh ata siç duhet. Për këtë arsye, sot ka një detashment ushtarak të përhershëm të vendosur nga britanikët në dy ishujt Falklands, ose Las Malvinas, siç i quajnë argjentinasit, me rreth 1500 ushtarë, ose dyfishi i trupave. Përveç këtyre, ka katër avionë luftarakë Tajfun, me avionë që i furnizojnë me karburant në ajër e që mund të operojnë nga ajri pa mbarimisht, si dhe sisteme të fuqishme radarësh.

Tajfunët britanikë janë shumë më të avancuar se avionët F16 të argjentinasve. Ndërkohë, në tokë janë instaluar sisteme të fuqishme raketore tokë-ajër, anije luftarake që patrullojnë rregullisht ishujt, si dhe një nga nëndetëset bërthamore britanike, që lundron rregullisht nën ujërat rreth ishujve Falklands.

E nëse argjentinasit do të guxonin të sulmonin sërish, do të duhet të fitonin luftën në ajër si fillim, por nëse eventualisht do të rihapej konflikti, përforcime ushtarake do të dërgoheshin menjëherë nga Britania.

Pavarësisht kërcënimeve nga presidenti argjentinas, ishujt Falklands kurrë nuk kanë qenë më të sigurt ushtarakisht sesa në dit

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Pas një ndërprerjeje të gjatë prej 14 vitesh, Festivali Kombëtar i Filmit Shqiptar është rikthyer me gjithë shkëlqimin e tij në Tiranë, duke u kthyer në kryeqendrën e artit dhe kulturës në vend.

Kjo ngjarje historike ka bërë bashkë qindra artistë, nga korifejtë e kinemasë shqiptare deri te kineastët e rinj e me talent, duke festuar trashëgiminë dhe të ardhmen e ekranit të madh.

Nata e hapjes solli emocione të shumta dhe momente nostalgjie, ku vëmendja kryesore u përqendrua te vlerësimi i figurave që kanë shkruar historinë e filmografisë sonë. Emra të mëdhenj si Reshat Arbana, Roza Anagnosti, Ibrahim Muçaj, Kristaq Mitro e të tjerë, u nderuan me Çmimet e Karrierës për kontributin e tyre të jashtëzakonshëm në artin shqiptar.

Megjithatë, si çdo event i rëndësishëm, nuk mund të kalonte pa debate. Pas një lapsusi në ceremoninë e hapjes nga organizatorët, ku në vend të fotos së regjisores së njohur Xhanfize Keko u vendos për pak sekonda në ekran fotoja e poetes Natasha Lako, për të cilën u kërkua ndjesë publike nga drejtori artistik i festivalit, z. Ilir Butka. Regjisori i njohur Mevlan Shanaj dhe e shoqja, znj. Natasha Lako, u revoltuan dhe shprehën pakënaqësinë e tyre përmes një statusi ku e cilësonin festivalin “obobo, kjo mynxyrë”, dhe u shprehën gjithashtu të pakënaqur për ndarjen e 16 çmimeve të karrierës.

Pavarësisht polemikave të natyrshme artistike, entuziazmi i publikut dhe pjesëmarrja e komunitetit kinematografik mbeten në nivele rekord.

Festimi i kinemasë vazhdon gjatë të gjitha këtyre ditëve me shfaqje filmash, debate dhe takime mes brezave. Sipari i këtij edicioni jubilar do të ulet më 12 shtator, në natën finale ku do të ndahen edhe çmimet kryesore të konkurrimit.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Manchester United frenohet këtë të dielë në ndeshjen e javës së tretë të Premier League angleze. Skuadra e Djajve të Kuq nuk shkoi më shumë se barazimi 2-2 ndaj Evertonit në sfidën e zhvilluar në Liverpool me skuadrën e Michael Carrick që e pa t’i shpëtonte fitorja nga duart vetëm në minutat shtesë të sfidës.

Pjesa e parë u mbyll me barazimin pa gola 0-0 kështu që e gjithë historia e kësaj ndeshjeje u shkrua në 45 minutat e dyta. Manchester United zhbllokoi rezultatin me Bryan  Mbeumo menjëherë me fillimin e këtij fraksioni të dytë të lojës duke marrë avantazhin në 1-0, një avantazh që diti ta menaxhojë deri në minutën e 83 kur Everton barazoi shifrat me golin e Tyrique George.

Por ekuilibri në rezultat zgjati pak pasi Djajtë e Kuq u kthyen në avantazh tani 2-1 me golin e Benjamin Sesko. U duk se të besuarit e Michael Carrick po merrin fitoren e dytë radhazi por në minutën e 96, Everton shënoi sërish duke barazuar shifrat në 2-2 me Maitland Niles dhe skuadrat dolën nga fusha e lojës me nga 1 pikë secila, me Everton që shkon në 5 pikë 1 më shumë se Manchester United.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Një banor i zonës së Peshtanit në Fier ka denoncuar përfshirjen nga zjarri të një sipërfaqeje pyjore, duke ngritur dyshime se flakët mund të jenë vendosur qëllimisht.

Sipas banorit, zjarri i një dite më parë ishte shuar në zonë, ndërsa sot flakët janë shfaqur në një tjetër pjesë të pyllit, e cila më herët nuk ishte prekur nga zjarri.

Kjo situatë ka shtuar dyshimet për ndërhyrje të qëllimshme, ndërsa banori kërkon që autoritetet të hetojnë shkaqet e rënies së zjarrit dhe të verifikojnë nëse pas flakëve fshihet një zjarrvënie e qëllimshme.

Për momentin, shkaku i zjarrit mbetet i paqartë dhe pritet që hetimet të përcaktojnë rrethanat e ngjarjes.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.

Ministria e Mbrojtjes informon se gjatë 24 orëve të fundit janë raportuar 32 vatra zjarri, nga të cilat 11 mbeten aktive, 5 janë nën mbikëqyrje dhe 16 janë fikur.

Për përballimin e situatës është realizuar një angazhim i gjerë operacional në nivel kombëtar, me 735 forca vendore dhe 64 automjete zjarrfikëse. Forcat e Armatosura kanë mbështetur operacionet me 475 efektivë, 7 automjete zjarrfikëse, 4 helikopterë dhe 1 avion Air Tractor. Për ditën e sotme është parashikuar angazhimi i 160 forcave ushtarake në zonat ku ndërhyrja vijon.

Angazhimi kryesor është përqendruar në vatrat më problematike.

Në Malin e Dajtit, krahas strukturave bashkiake, sot janë angazhuar 77 forca ushtarake dhe 1 helikopter.

Në Bardhaj të Shkodrës, janë angazhuar 5 automjete zjarrfikëse, shërbimi pyjor, strukturat e emergjencave civile, si dhe mbështetje nga FA me 1 automjet zjarrfikës dhe 1 helikopter, ndërsa sot operacionit i shtohen 33 forca dhe 1 ambulancë.

Në Fier, janë përfshirë 13 automjete zjarrfikëse, 4 autobote, 55 efektivë, 90 forca të tjera, si dhe 90 ushtarakë, 1 helikopter dhe 1 Air Tractor. Sot vijon mbështetja me 33 forca.

Operacioni në Himarë është përmbyllur me fikjen e zjarrit, pas një mobilizimi të gjerë me 26 automjete zjarrfikëse, 120 efektivë, 40 vullnetarë, 67 forca bashkiake, 20 forca policore dhe 180 efektivë të FA me 2 helikopterë.

Agjencia Kombëtare e Mbrojtjes Civile (AKMC) vijon të ndjekë në mënyrë të pandërprerë situatën në të gjithë territorin e vendit, në koordinim të ngushtë me prefekturat, bashkitë dhe të gjitha strukturat e sistemit të Mbrojtjes Civile.

Kapacitetet operacionale mbeten të angazhuara në terren dhe në gatishmëri për të ndërhyrë aty ku situata e kërkon, me prioritet mbrojtjen e jetës, banesave, pasurisë së qytetarëve dhe mjedisit.

© Top Channel 2001 – 2026 • Ndalohet riprodhimi i paautorizuar i
përmbajtjes së kësaj faqeje.